Türkiyənin "Robotzadə” şirkəti "Robotlar Azərbaycana gəlir” şüarı ilə yeni ofisinin açılışını edib.
Şirkətin Azərbaycan ofisinin direktoru Əhməd Özaslanın TED.az-a verdiyi məlumata görə, "Robotzadə” şirkəti bir neçə ildir, Azərbaycandakı universitet, məktəb və müxtəlif şirkətlərlə əməkdaşlıq edir: "Həm təlim, həm satış üzrə Azərbaycandan gələn ciddi tələblərə görə bu addımı atdıq. Azərbaycan və Türkiyənin sarsızlmaz qardaşlığı, bütün sahələrdəki geniş əməkdaşlıqları bizə də stimul verir ki, Türkiyənin texnologiya sahəsindəki, təcrübələrini qardaş Azərbaycana daşıyaq, İstedadlı Azərbaycanlı gənclərin İstədikləri məhsullara əlçatanlığını təmin edək və birgə layihələr həyata keçirək. Bașda STEAM, Maker və Robot laboratoriyaları olmaqla robot detalları, robot kitləri, Arduino dəstləri, öyrədici dəstlər, dron detalları, 3D printerlər, sensorlar və bir çox məhsul ilə təxminən 3000 fərqli çeşidimiz mövcuddur”.
Ə.Özaslan onu da deyib ki, Azərbaycanın bütün bölgələrində olan məktəb və qurumlara laboratoriyaların təşkili və materialların satışını həyata keçirməyi planlaşdırırlar: "Bildiyiniz kimi, bu il "Bayraqdar” şirkətinin böyük layihəsi olan "Texnofest” Azərbaycanda keçiriləcək. Bu da Azərbaycanın böyük zəfərdən sonra Türkiyə ilə birgə regionda texnoloji bilik və bacarıqların inkişafına xidmət edəcək, Azərbaycanı bu sahədə bölgənin lider dövlətinə çevirəcək. Bunun üçün də istər universitetlər, istər orta və peşə məktəbləri "Texnofest” üçün hazırlıqlara başlayır. Onlara lazım olacaq avadanlıqların hamısını mağazamızdan əldə edə bilərlər. İdeyalarının gerçəkləşdirilməsi üçün lazımi dəstəyi verməyə hazırıq.
Direktor bildirib ki, uzun illərdir, Türkiyədə bu təhsil robotlarının, elektronik avadanlıqlarının istehsalı ilə məşğuldurlar: "Ən böyük işimiz isə Azərbaycan markalı milli robot kitlərinin istehsalını həyata keçirmək olacaq. Artıq istehsalat mərkəzimiz üçün lazımi avadanlıq və laboratoriyanın hazırlıqlarını, demək olar, yekunlaşdırmışıq. Fevral ayından etibarən şirkətimizdə şagird, tələbə, mühəndis, müəllimlər, ümumiyyətlə, bu sahə ilə maraqlananlar üçün ödənişsiz təlimlərə, ideya müzakirələrinə, təhsil və kurslara start verəcəyik. Ümid edirik, Azərbaycan-Türkiyə qardaşlığının inkişafına, "Bir millət, iki dövlət” ideyasının möhkəmlənməsinə bizim də töhfəmiz olacaq”.
Qeyd edək ki, "Robotzadə” şirkətinin ofisi və mağazası Azadlıq prospekti, 48 ünvanında yerləşir.
