"Samsung"un 100x yaxınlaşdırma xüsusiyyəti ilə diqqət çəkən "Galaxy S20 Ultra" modeli və digər S20 seriyası nümunələri proqram təminatı yeniləmələrinə vida edir. Lakin seriyanın buraxığı izlər "Android" dünyasında xatırlanmağa davam edəcək.

HİT.az xəbər verir ki, 2020-ci ildə təqdim edilən "Samsung"un flaqman modeli "Galaxy S20 Ultra" şirkətin "Space Zoom" adlandırdığı 100x yaxınlaşdırma xüsusiyyətinə malik ilk smartfonlardan biri kimi diqqət çəkmişdi. Şirkət "Galaxy S20" seriyasının hamısına dörd illik təhlükəsizlik yeniləmələri və üç illik "Android" əməliyyat sistemi yüksəldilməsi təqdim etmək vədi vermişdi.

"Galaxy S20", "Galaxy S20+" və "Galaxy S20 Ultra" modellərindən ibarət olan seriya üçün nəzərdə tutulan dəstək müddəti başa çatdığı üçün "Samsung" bu cihazları Proqram Təminatı Yeniləmə Proqramından çıxarıb. Ancaq "Samsung" yalnız dörd illik yeniləmə vədi verməsinə baxmayaraq, keçən il aprel ayında cihazlara rüblük yeniləmə proqramı əlavə edərək dəstək müddətini bir qədər uzatmışdı. Seriyanın son təhlükəsizlik yeniləməsi isə keçən ay, mart 2025-də yayımlanmışdı.

Artıq "Samsung" 2020-ci ilin flaqman seriyası üçün proqram təminatı dəstəyini tamamilə dayandırmış görünür. Lakin oktyabr 2020-də satışa çıxarılan "Galaxy S20 FE" modeli Rüblük Təhlükəsizlik Yeniləmələri proqramına daxil edilib. Bu model hələ bir müddət hər üç aydan bir təhlükəsizlik yeniləmələri almağa davam edəcək olsa da, onun da yaxın gələcəkdə dəstək proqramından çıxarılması gözlənilir.

"Samsung"un proqram təminatı yeniləmə prosesinə yanaşması istifadəçilərinə cihazları uzun müddət təhlükəsiz şəkildə istifadə etmə imkanı təqdim etmək istədiyini göstərir. Lakin "Galaxy S20" seriyasının proqram dəstəyi bitməsinə baxmayaraq, bu cihazlar "Android" ekosistemində təsirli xüsusiyyətləri və innovativ dizaynları ilə yadda qalacaq. Yenə də, hal-hazırda bu cihazlardan birini istifadə edirsinizsə, daha yeni bir modelə keçməyi düşünə bilərsiniz. Çünki təhlükəsizlik yeniləmələri almayan cihazın xarici təhdidlər qarşısında hər gün daha çox müdafiəsiz qalacağını unutmamaq lazımdır.

Samir