"Google Axtarış"ın çox müzakirə olunan funksiyalarından biri olan "AI Overviews" (Süni intellekt ümumi baxış) bütün bu mübahisələrin fonunda "YouTube"a da inteqrasiya olunur. Bəs bu dəyişiklik "YouTube" təcrübəsini necə təsir edə bilər?
HİT.az xəbər verir ki, əgər son zamanlarda "Google"da axtarış edərkən yenilikçi bir funksiyaya rast gəlmisinizsə, bu, böyük ehtimalla "AI Overviews" funksiyasıdır.
"Google", "Gemini" süni intellekt sistemi ilə dəstəklənən bu xüsusiyyət vasitəsilə axtarış nəticələrindəki müxtəlif bağlantılardan məlumatları toplayıb istifadəçilərə qısa xülasə şəklində təqdim edir.
Bu xülasələr istifadəçilərin istədikləri məlumata daha az kliklə çatmasını təmin etməyi, axtarış təcrübəsini sürətləndirməyi və asanlaşdırmağı hədəfləyir. Lakin bu yenilikçi xülasələrin dəqiqliyi bəzən mübahisələrə səbəb olur, istifadəyə verildiyi gündən bəri müşahidə edilən halüsinasiyalar (yanlış məlumat istehsalı) bəzi hallarda əyləncəli nəticələr doğursa da, ümumilikdə istifadəçi etibarına mənfi təsir edir.
"Google" bu funksiyanı "YouTube"a da gətirərək rəqəmsal məzmun təcrübəsinə yeni nəfəs verməyi planlaşdırır. Hazırda ABŞ-da məhdud sayda "YouTube Premium" abunəçisi ilə həyata keçirilən pilot layihə çərçivəsində müəyyən ingilis dilində axtarış sorğularında süni intellekt dəstəyi ilə video xülasələri test edilir. "Google"un axtarış nəticələrində təqdim etdiyi mətn əsaslı xülasələrdən fərqli olaraq, "YouTube"da istifadəçilərə mühüm video anlarını əks etdirən qısa kliplər təqdim olunur. Xüsusilə "ən yaxşı qulaqcıqlar" kimi məhsul icmalları və ya "Los-Ancelesdə ziyarət ediləcək yerlər" kimi səyahət tövsiyələri axtarışlarında bu yeniliyin istifadəçi təcrübəsini əhəmiyyətli dərəcədə yaxşılaşdıracağı gözlənilir.
Bununla yanaşı, bu yeni tətbiqin video məzmun istehsalçılarına təsiri də sual doğurur. Axtarış nəticələrindəki süni intellekt xülasələrinin normalda məzmun istehsalçılarına yönəlməli olan trafiki azaltdığına dair narahatlıqlar mövcuddur. "YouTube"da bənzər bir xülasə funksiyasının tətbiq olunması, video məzmun istehsalçılarının reklam gəlirləri və izləyici qarşılıqlı əlaqələri baxımından oxşar problemlərə səbəb ola bilər.
"Google" rəsmiləri süni intellekt tərəfindən yaradılan bu kliplərin istifadəçilər tərəfindən necə qarşılandığına dair dəyərli rəy toplamağı planlaşdırır. Bu rəylər sistemin gələcək təkmilləşdirilməsi üçün əsas məlumat mənbəyi olacaq. Lakin pilot proqramın nə qədər davam edəcəyi və gələcəkdə "Premium" abunəliyi olmayan istifadəçilərə də təqdim olunub-olunmayacağı barədə hələlik dəqiq bir məlumat yoxdur.
Bu inkişaflar "Google"un süni intellekt texnologiyalarını axtarış və video platformalarına inteqrasiya edərkən istifadəçi təcrübəsi ilə məzmun istehsalçılarının gəlir modelləri arasında necə tarazlıq yaratmağa çalışdığını ortaya qoyur. Texnologiyanın bu nöqtəyə çatması SEO-ya uyğun məzmun strategiyalarında da mühüm dəyişikliklərə səbəb ola bilər; çünki istifadəçilərin daha tez və xülasə şəklində məlumata çatmaq istəyi, məzmun istehsalının yeni dinamikalarla formalaşmasına yol aça bilər.
Samir
