iOS 19, "Apple"ın batareya idarəetməsini tamamilə dəyişəcək süni intellekt (AI) dəstəkli yeni bir xüsusiyyətlə çıxış etməyə hazırlaşır. İstifadəçilərin cihazdan istifadə vərdişlərinə uyğun olaraq enerji sərfiyyatını optimallaşdıran bu yenilik, "iPhone"unuzu daha səmərəli edə bilər.
HİT.az xəbər verir ki, "Apple"ın iOS yeniləmələri həmişə texnologiya dünyasında böyük maraq doğurur. "Bloomberg"dən Mark Qurman WWDC 2025-ə cəmi bir aydan az qalmış "Apple"ın iOS 19-un yeni xüsusiyyətlərindən birini də açıqlayıb.
Qurmana görə, "Apple" iOS 19 ilə istifadəçinin cihazdan necə istifadə etdiyini təhlil edə bilən və enerjiyə qənaət üçün avtomatik tənzimləmələr edə bilən süni intellekt dəstəkli batareya idarəetmə rejimi təqdim etməyi planlaşdırır.
Bu yeni xüsusiyyət, "Apple"ın uzun müddətdir gündəmdə olan "Apple Intelligence" ekosisteminin bir hissəsi olacaq. Lakin bu funksiyanın nə qədər innovativ olması qədər, əvvəllər təxirə salınmış bəzi xüsusiyyətlərin də diqqət çəkməsi qaçılmazdır. "MacWorld" müəllifi Filipe Esposito 2023-ün sonunda "9to5Mac" üçün yazdığı məqalədə "Apple-ın" iOS 18.2 beta versiyasında telefonun doldurulma müddətini proqnozlaşdıra bilən yeni bir "Battery Intelligence" çərçivəsi hazırladığını bildirmişdi.
Lakin bu xüsusiyyət iOS 18-in final versiyasında yer almadı. Bu da, "Apple"ın planladığı bəzi yenilikləri müvəqqəti olaraq təxirə saldığını göstərir. Mark Qurman qeyd edir ki, "Apple"ın yeni AI dəstəkli batareya idarəetmə rejimi, əslində iOS 18-də olması gözlənilən, lakin sonradan təxirə salınan "Apple Intelligence" xüsusiyyətlərindən biridir. Bu o deməkdir ki, "Apple" cihazları daha səmərəli etmək üçün güclü süni intellekt texnologiyasından batareya idarəetmə kimi vacib bir sahədə istifadə edəcək.
Qurmana görə, bu yeni batareya idarəetmə sistemi istifadəçilərin cihazlarından toplanan məlumatlardan istifadə edərək, cihazın hansı tətbiqlərə və ya funksiyalara nə vaxt enerji qənaət rejimini tətbiq etməli olduğunu proqnozlaşdıracaq. Bundan əlavə, cihazın tam doldurulması üçün nə qədər vaxt lazım olduğunu göstərən bir qıfıl ekranı göstəricisi də istifadəçilərə təqdim olunacaq. Bu xüsusiyyət, istifadəçilərin batareya idarəetməsini daha yaxşı anlamasına və cihazlarını daha səmərəli istifadə etməsinə kömək edəcək.
iOS 19-un batareya idarəetməsində gətirəcəyi yeniliklər, "Apple"ın süni intellekt və istifadəçi məlumatlarından necə istifadə etdiyinin əhəmiyyətli bir göstəricisi olacaq. Xüsusilə enerji səmərəliliyi və istifadəçi təcrübəsini yaxşılaşdırmaq məqsədi daşıyan bu xüsusiyyət, "iPhone" istifadəçiləri üçün böyük bir addım ola bilər.
Samir
