Böyük Britaniyanın Lafboro Universitetində (Loughborough University) elm adamları insan saçından da incə ölçüyə sahib olan və adi gözlə görünməyəcək qədər kiçik "nano-kaman" yaradıblar. Bu qeyri-adi layihə yalnız maraqlı bir texniki nailiyyət deyil, eyni zamanda gələcəyin informasiya emalı və enerji istifadəsi sahələrində mühüm ipucları təqdim edir.

HİT.az xəbər verir ki, nano-kamanın uzunluğu cəmi 35 mikron, eni isə 13 mikrondur. Müqayisə üçün qeyd edək ki, insan saçının qalınlığı adətən 17–180 mikron arasında dəyişir. Bu isə onu deməyə əsas verir ki, yeni hazırlanan kaman insan saçının içinə belə yerləşə bilər və adi gözlə görünməsi mümkün deyil.

Lafboro Universitetinin Fizika fakültəsinin rəhbəri professor Kelli Morrison layihə ilə bağlı açıqlamasında bildirib: “Dünyanın ən kiçik kamanını hazırlamaq ilk baxışda əyləncəli bir ideya kimi görünsə də, bu proses ərzində əldə etdiyimiz biliklər irəlidə aparacağımız yüksək səviyyəli tədqiqatlar üçün baza rolunu oynayır”.

Nano-kamanın istehsalı üçün "NanoFrazor" adlanan xüsusi bir nanofabrikasiya alətindən istifadə olunub. Bu cihaz jöleyə bənzər müqavimət materialı ilə örtülmüş çipin üzərinə, mikroskopik ölçüdə qızdırılmış incə bir ucla kamanın formasını “yazıb”. Daha sonra bu forma oyularaq içi boşaldılıb və üzərinə nazik platin təbəqəsi çəkilib. Son olaraq, asetonla aparılan təmizlik nəticəsində artıq materiallar təmizlənib və kaman formasında platin strukturu əldə edilib.

Bütün proses tamamilə nəzarət olunan, xarici təsirlərdən təcrid olunmuş laboratoriya şəraitində həyata keçirilib. Tədqiqatçılar çipin hərəkətini təmin edən bağlı otaqlar və xaricdən idarə olunan metal qollar vasitəsilə əməliyyatları icra ediblər.

Samir