“iPhone” istifadəçiləri üçün yol tarifi almaq məsələsində ciddi bir seçim dilemması yaranır. Telefona əvvəlcədən quraşdırılmış “Apple Xəritələr”dən istifadəni davam etdirmək lazımdır, yoxsa vərdişlərə uyğun olaraq “Google Xəritələr”i yükləmək?

HİT.az xəbər verir ki, on il əvvəl bu sualın cavabı birmənalı idi, lakin 2025-ci ilə gəldikdə vəziyyət dəyişib. Artıq hər iki tətbiq gediş vaxtlarının hesablanmasından marşrut dəqiqliyinə qədər demək olar ki, eyni səviyyədə nəticə göstərir. Fərq o qədər azalıb ki, seçim artıq performansdan çox, hansı texnoloji ekosistemə daha yaxın olduğunuz və nələrə üstünlük verdiyinizlə bağlıdır.

Bu rəqabətdə ən nəzərəçarpan fərq tətbiqlərin əhatə dairəsində ortaya çıxır. “Google Xəritələr” aylıq iki milyarddan çox aktiv istifadəçisi ilə “Android”dən “iOS”a, veb brauzerlərdən avtomobil ekranlarına qədər hər yerdə mövcuddur. “Apple Xəritələr” isə yalnız “Apple” loqolu cihazlarda, “iOS” və “CarPlay” ilə tam uyğun şəkildə işləyir. Marşrut müəyyənləşdirmə baxımından hər iki nəhəng oxşar nəticələr versə də, əsas ayrılıq gizlilik yanaşmalarında, interfeys dizaynında və naviqasiyadan kənar əlavə imkanlarda hiss olunur.

Əgər rəqəmsal dünyada atdığınız hər addımın izlənilməsindən narahatsınızsa, bu nöqtədə “Apple Xəritələr” ön plana çıxır. “Google” reklam əsaslı biznes modeli səbəbindən məlumat toplayarkən, “Apple” xəritələrdən istifadə üçün hətta hesabla daxil olmağı belə məcburi etmir. Şirkət “fuzzing” adlanan metoddan istifadə edərək məkan məlumatlarını maskalayır. Bu o deməkdir ki, bir gün keçdikdən sonra axtardığınız nöqtə artıq dəqiq ünvan kimi deyil, ümumi bir ərazi kimi sistemdə saxlanılır. Nəticədə heç kim haraya getdiyiniz barədə detallı profil yarada bilmir.

Sürüş təcrübəsində isə “Apple” klassik “500 metr sonra dön” əvəzinə “işıqfordan sola dön” kimi daha insani və anlaşılan göstərişlər verir. Bundan əlavə, “Apple Watch” və “Siri” ilə inteqrasiya “Apple” istifadəçiləri üçün gündəlik həyatı xeyli asanlaşdırır.

Digər tərəfdən, “Google Xəritələr” demək olar ki, real dünyanın axtarış sistemi kimi fəaliyyət göstərir. Dünyadakı ağıllı telefonların böyük hissəsinin “Android” əməliyyat sistemində işləməsi “Google”a nəhəng həcmdə real vaxtlı trafik məlumatı təqdim edir.

“Google”un əsas fərq yaratdığı məqam isə naviqasiyanın çox-çox kənarına çıxmasıdır. Restoran rəylərindən tutmuş aktual yanacaq qiymətlərinə qədər hər cür məlumat istifadəçinin əlinin altındadır. Artıq tətbiqə inteqrasiya edilən “Gemini” süni intellekti sayəsində xəritə sadə naviqasiya alətindən daha çox yerli bələdçiyə çevrilib. Məsələn, tətbiqə “burada münasib qiymətə harada qəhvə içmək olar?” sualını verdikdə, onlarla rəyi oxumadan birbaşa cavab almaq mümkündür.

Nəticə etibarilə, “Apple” sizə sakit və məxfi bir yolçuluq vəd edərkən, “Google” ətrafınızdakı dünyanı kəşf etməyiniz üçün ağıllı köməkçi rolunu oynayır.

Samir