İnternet yayımçılığının mərkəzi sayılan “Twitch” bu günə qədər analoqu olmayan bir rəqəmsal çevrilişə şahidlik edir. Tərtibatçı "Vedal987" tərəfindən yaradılan süni intellekt əsaslı yayımlayıcı “Neuro-sama” platformanın ən böyük adlarını geridə qoyaraq abunəlik rekordlarını alt-üst edib. İnsan yayımlayıcıların mövqeyini sarsıdan bu animasiyalı obraz sadəcə proqram təcrübəsi olmaqdan çıxaraq “Twitch” tarixinin ən çox abunəçiyə sahib kanalı olmağı bacarıb.

HİT.az xəbər verir ki, “Neuro-sama”, “Twitch”in ən məşhur simalarından biri olan “Jynxzi”nin təxminən 74 minlik abunə sayını ikiqat artıraraq 160 mindən çox aktiv abunəçiyə yüksəlib. Lakin ən diqqətçəkən məqam izləyicilərin qısa müddətdə intensiv ianə və abunə göndərdiyi “Hype Train” adlı tədbir zamanı yaşanıb.

Süni intellekt personajı bu tədbirdə 126-cı səviyyəyə çataraq bu kateqoriya üzrə dünya rekordu qırıb. Saatlarla davam edən bu dəstək dalğası izləyicilərin artıq bir alqoritmi dəstəkləməkdən çəkinmədiyini və süni intellekt şəxsiyyətlərini mənimsədiyini açıq şəkildə göstərib.

Ritm oyunlarından “Twitch” zirvəsinə

Əslində “Neuro-sama”nın hekayəsi yeni deyil. Onun əsası 2018-ci ildə “osu!” adlı ritm oyununu oynayan sadə bir botla qoyulub. Zamanla inkişaf edən bu sistem bu gün “ChatGPT” və ya “Gemini” kimi hazır infrastrukturdan istifadə etmədən, tamamilə özünəməxsus müstəqil proqram təminatı ilə fəaliyyət göstərir.

Sintetik səsi, animasiyalı modeli və izləyicilərlə qurduğu xaotik dialoqlar sayəsində özünəməxsus icma formalaşdırıb. Hətta bəzən canlı yayımda öz yaradıcısını belə lağa qoyması ilə tanınır. İzləyicilər onu sadəcə “texnologiya nümayişi” kimi deyil, əyləncəli və fərqli xarakter kimi qəbul edirlər.

Yayımçılıq dünyasında tarazlıq dəyişirmi?

Bir süni intellektin ən çox dəstək alan yayımlayıcıya çevrilməsi rəqəmsal əyləncə dünyasında sərhədlərin nə qədər bulanıqlaşdığını sübut edir. İnsan təması və ani reaksiyaların ön planda olduğu bir platformada sətir-sətir koddan ibarət bir obrazın bu qədər böyük maliyyə dəstəyi görməsi izləyici profilinin çevikliyini ortaya qoyur.

İnsanlar qarşılarındakının bir robot olduğunu bildikləri halda belə, təqdim olunan əyləncə və icma hissi naminə real pul xərcləməkdən çəkinmirlər.

Samir