Uelsin paytaxtı Kardiffdən olan Fibi Tesorye uzun illər həkimlərin onun simptomlarını narahatlıqla əlaqələndirməsindən sonra, öz vəziyyətinin səbəbini ChatGPT vasitəsilə müəyyən edə bilib. 

HİT.az xəbər verir ki, bu barədə “Daily Star” yazır.

Qız süni intellektə müraciət etdikdə vəziyyəti artıq ciddi şəkildə pisləşmişdi. Onun simptomlarına ayaqlarda sərtlik, əzələ zəifliyi və saç tökülməsi daxil idi. Fibi məlumatları ChatGPT-yə daxil etdikdən sonra sistem nadir irsi xəstəlik — irsi spastik paraplegiyanı ehtimal edib.

O, nəticələri ilə həkimə müraciət edib və genetik test tələb edib. Analizlər diaqnozu təsdiqləyib: Fibidə kompleks kvadriplejik forma irsi spastik paraplegiya aşkarlanıb — bu, bütün ətraf əzələlərini tədricən zədələyən olduqca nadir xəstəlikdir.

Fibi bildirib ki, bundan əvvəl dörd il ərzində ona səhv diaqnozlar qoyulub, o cümlədən narahatlıq pozuntusu və Todd iflici (qıcolmalardan sonra yaranan müvəqqəti əzələ sərtliyi).

“Bu həm acı, həm də rahatladıcı bir an idi. Bir tərəfdən nə baş verdiyini nəhayət öyrəndim, digər tərəfdən isə bu həyatımı tam dəyişən bir diaqnozdur”, deyə o bildirib.

Xəstəlik getdikcə irəliləyir və artıq təkcə ayaqları deyil, əlləri də təsir altına alıb. Buna görə qız xüsusi ehtiyaclı uşaqlara dərs verdiyi işini tərk etməli olub.

Hazırda Fibinin bacısı, 32 yaşlı Yasmin onun üçün onurğanı dəstəkləyən və müstəqilliyi qorumağa kömək edən xüsusi əlil arabası üçün ianə kampaniyası təşkil edib.

Samir