Ağıllı eynəklər futuristik cihazdan gündəlik aksesuara çevrildikcə, onların ətrafı hiss olunmadan qeydə alma imkanı yeni problem yaradır. Əsas çətinlik ondadır ki, “Meta Ray-Ban” kimi müasir modellərdə çox kiçik kamera, mikrofon və qeyd indikatorları var və bunlar real mühitdə asanlıqla gözə dəymir. İstifadəçi səs əmri və ya düymə ilə yazını başlada bilər, ətrafdakılar isə çox vaxt çəkildiyini anlamır.

HİT.az xəbər verir ki, BGR jurnalistlərinin yazdığına görə, “bir baxışda” çəkilişi dəqiq müəyyən etməyin tam etibarlı yolu yoxdur, lakin cihazın işlək vəziyyətdə olduğunu göstərən bir neçə əlamət var.

1. Qeyd indikatoru

Bir çox ağıllı eynəkdə foto və video çəkiliş zamanı yanan LED indikator olur. Bu, ətrafdakı insanları xəbərdar etməlidir, lakin praktikada işıq çox zəif ola bilər və ya gün işığında görünməz qalır. Bəzən isə örtülə də bilər. Buna görə indikator faydalı siqnaldır, amma olmaması çəkiliş aparılmadığı anlamına gəlmir.

2. Kamera obyektivlərini axtarın

Ağıllı eynəklərdə kameralar adətən çərçivənin künclərində və ya yuxarı hissəsində yerləşdirilir və uzaqdan dekor kimi görünə bilər. Yaxından baxdıqda kiçik dəliklər, şüşə linzalar və ya parlaq nöqtələr seçilə bilər. Bəzən kamera burun körpüsü hissəsində yerləşir. Daha qalın çərçivə də içəridə elektronika və batareya ola biləcəyinə işarədir.

3. Şübhəli hərəkətlər və jestlər

Bu eynəklər çox vaxt toxunma və ya jestlə idarə olunur. İnsan dənəklərə toxunur, yan hissəni sürüşdürür və ya təkrarlanan hərəkətlər edir. Həmçinin başı yavaş-yavaş istiqamətləndirib sizi “kadrda saxlamaq” cəhdi də çəkiliş əlaməti ola bilər.

4. Səslər və səs əmrləri

Bəzi modellər çəkiliş başlayanda səs siqnalı verir – klik və ya ton kimi. Həmçinin “foto çək” və ya assistentə yönəlmiş səs əmrləri kameranın aktiv olduğunu göstərə bilər.

5. Ağıllı cihazları aşkarlayan tətbiqlər

Bəzi mobil tətbiqlər Bluetooth siqnalları vasitəsilə yaxınlıqda ağıllı eynəkləri müəyyən etməyə çalışır. Lakin bu üsul həmişə dəqiq olmur və yanlış nəticələr verə bilər, buna görə yalnız əlavə vasitə kimi qəbul edilir.

Ağıllı geyilə bilən cihazların yayılması fonunda ekspertlər xəbərdarlıq edir: bu texnologiya “gizli müşahidə” anlayışını dəyişir və cəmiyyət hələ buna tam uyğunlaşmayıb.

Samir