USB-hablar noutbuk və PC-lər üçün geniş yayılmış aksesuar hesab olunur. Onlar xüsusilə müasir nazik cihazlarda port çatışmazlığını aradan qaldırmağa kömək edir. Lakin bu rahatlıq yanlış istifadə edildikdə problemlərə səbəb ola bilər.

Hit.az-ın "SlashGear"ə istinadən xəbərinə görə, mütəxəssislər xəbərdarlıq edir ki, bütün cihazlar USB-hab vasitəsilə təhlükəsiz işləməyə uyğun deyil. Bəzi hallarda bu, performansın azalmasına, qeyri-sabit işə, qızmaya və hətta avadanlığın zədələnməsinə gətirib çıxara bilər. Aşağıda USB-haba qoşulması tövsiyə olunmayan 5 cihaz təqdim olunur.

Smartfonlar

Müasir smartfonlar USB-C portu üzərindən Power Delivery (PD) standartı ilə sürətli şarjı dəstəkləyir. Lakin xüsusilə xarici qidalanma mənbəyi olmayan USB-hablar bu gücü təmin edə bilmir. Nəticədə telefon çox yavaş şarj ola bilər və ya sürətli şarj rejiminə keçməyə bilər.

Əgər smartfonu USB-hab vasitəsilə şarj etmək zəruridirsə, onun aktiv (qida ilə təmin olunan) hub və ya kifayət gücə malik dok-stansiya olduğuna əmin olmaq lazımdır.

Sərt disklər

Portativ HDD-lər sabit enerji tələb edir. Zəif USB-hab vasitəsilə qoşulma enerji çatışmazlığına, nasazlığa və hətta məlumat itkisinə səbəb ola bilər.

Bəzi hallarda sərt diskdən gələn “klik” səsləri təhlükə siqnalı hesab olunur və cihaz dərhal ayırılmalıdır. Əks halda disk zədələnə bilər.

Yüksək ötürmə sürəti tələb edən cihazlar

USB-hablar mövcud ötürmə sürətini artırmır. Bütün qoşulan cihazlar eyni kanalın bant genişliyini bölüşür. Bu isə “tıxac” yaradaraq ümumi sürəti azaldır.

Eyni anda xarici SSD və veb-kamera kimi cihazlardan istifadə edildikdə gecikmələr və performans itkisi qaçılmaz olur.

USB-habların zəncirvari qoşulması

Bir USB-habı digərinə qoşmaq texniki baxımdan mümkün olsa da, praktikada tövsiyə edilmir. Bu, həm ötürmə sürətini daha da azaldır, həm də gecikməni artırır.

Xüsusilə klaviatura, siçan və audio avadanlıq kimi periferiyalarda bu gecikmə istifadə təcrübəsini nəzərəçarpacaq dərəcədə pisləşdirə bilər.

USB4 cihazları

USB4 yüksək sürət və güc imkanları təqdim edir. Lakin əksər USB-hablar yalnız USB 3.x və ya daha köhnə standartları dəstəkləyir.

Bu səbəbdən USB4 cihazı hub vasitəsilə qoşulduqda maksimum sürət əldə edilmir. Tam potensial yalnız birbaşa uyğun portlara və ya USB4/Thunderbolt dəstəkləyən dok-stansiyalara qoşulduqda mümkündür.

Samir