Polşanın “Nevomo” şirkəti mövcud dəmir yolu infrastrukturundan istifadə etməklə maqnit levitasiyası texnologiyasını tətbiq etməyə imkan verən “MagRail” sistemini hazırlayır. Layihə artıq beynəlxalq diqqət cəlb edib və 2026-cı il “European Inventor Award” mükafatının finalına yüksəlib.

HİT.az xəbər verir ki, bu barədə “SpidersWeb” yazır.

Layihə illər əvvəl Hyperloop konsepsiyası üzərində aparılan tədqiqatlardan inkişaf edib. Komanda yeddi il ərzində Polşanın Novi Saçin bölgəsində müxtəlif texnoloji həlləri sınaqdan keçirib. Vakuum nəqliyyatı ideyası geniş dəstək itirdikdən sonra mühəndislər daha real yanaşmaya keçərək mövcud dəmir yolu şəbəkəsinin modernləşdirilməsinə fokuslanıblar.

Yeni sistemin əsas ideyası yeni və bahalı rels xətləri tikmək əvəzinə, dünyada təxminən 1,5 milyon kilometr mövcud dəmir yolu infrastrukturundan istifadə etməkdir.

İlk kommersiya məhsulu yük daşımalarına yönəlmiş “MagRail Booster” sistemidir. Bu texnologiya vaqonların altına passiv maqnit lövhə, relslər arasında isə elektromaqnit idarəedici element yerləşdirilməsini nəzərdə tutur. Sistem lokomotiv olmadan vaqonların sürətlənməsi və ya əyləclənməsinə imkan verir.

Tərtibatçılara görə, bu yanaşma dəmir yolu daşımalarında əsas problemlərdən biri olan eniş və yoxuşlarda dartı itkisini aradan qaldırır. Nəticədə vaqonlar relyefdən asılı olmayaraq daha effektiv hərəkət edə bilir.

Şirkət bildirir ki, texnologiya daha uzun yük qatarlarının formalaşdırılmasına və əlavə lokomotivlərə ehtiyacın azalmasına şərait yaradır. Bu isə xərcləri əhəmiyyətli dərəcədə azaldır. Sistem artıq Avropa, Hindistan və Yaxın Şərqdəki limanlar, sənaye müəssisələri və logistika mərkəzlərində maraq doğurub.

Növbəti mərhələdə isə sərnişin daşımaları üçün tam maqnit levitasiya sisteminin tətbiqi planlaşdırılır. Bunun üçün yüngül xüsusi vaqonlar tələb olunacaq, lakin yenə də mövcud rels infrastrukturu istifadə ediləcək.

Tərtibatçılar hesab edir ki, hazırda 300–350 km/saat sürətlə işləyən yüksək sürətli qatarlar bu sistemlə 550 km/saatadək sürətə çata bilər.

“Nevomo”nun fikrincə, yüksək infrastruktur xərcləri indiyədək belə texnologiyaların geniş yayılmasını məhdudlaşdırıb. Polşa modeli isə onları daha əlçatan edə bilər.

Şirkət həmçinin əməliyyat xərclərinin 85%-ə qədər azalacağını və avtomobil daşımaları ilə müqayisədə istixana qazı emissiyalarının 95% aşağı düşəcəyini iddia edir.

Hazırda söhbət əsasən konsept və sınaqlardan gedir; sərnişin daşımalarında sistem hələ tətbiq olunmayıb və göstəricilər tərtibatçıların hesablamalarına əsaslanır.

Samir