“Apple” şirkəti “iPhone 18 Pro” modelində kamera sistemini əhəmiyyətli dərəcədə təkmilləşdirməyə hazırlaşır. Sızdırılan məlumatlara görə, cihazda üç əsas yenilik olacaq və bunlar foto keyfiyyətini ciddi şəkildə artıracaq.

HİT.az bu barədə " 9to5Mac"a istinadən xəbər verir.

Əsas yenilik dəyişən diafraqmalı kamera olacaq. Bu texnologiya kameraya daxil olan işıq miqdarını avtomatik və ya əl ilə tənzimləməyə imkan verəcək. Nəticədə istifadəçilər müxtəlif çəkiliş şəraitinə, xüsusilə zəif işıqlandırmaya daha yaxşı uyğunlaşa biləcək, həmçinin dərinlik effektini daha dəqiq idarə edə biləcəklər.

Dəyişən diafraqma texnologiyası artıq bəzi Android istehsalçıları, o cümlədən “Xiaomi” və “Honor” tərəfindən istifadə olunub, lakin “iPhone” seriyası üçün bu, ilk belə tətbiq olacaq.

İkinci yenilik teleobyektivlə bağlıdır. Məlumatlara əsasən, “Apple” bu kameranın diafraqmasını genişləndirəcək ki, bu da zəif işıqda çəkiliş keyfiyyətini yaxşılaşdıracaq. Hazırda məhz teleobyektiv iPhone kameralarında gecə çəkilişlərində ən zəif hissələrdən biri hesab olunur.

Bundan əlavə, “iPhone 18 Pro” və “iPhone 18 Pro Max” modellərində genişləndirilmiş parametrlərə malik yeni “Kamera” tətbiqi təqdim olunacaq. Bu yenilik smartfon kameralarını peşəkar fotoaparatlara daha da yaxınlaşdıracaq.

Şirkət həmçinin “iPhone 16” seriyasında təqdim olunan kamera idarəetmə düyməsini də təkmilləşdirməyi planlaşdırır. Sızmalar təsdiqlənərsə, “iPhone 18 Pro” seriyası “Apple” tarixində kamera baxımından ən böyük yeniləmələrdən birinə sahib olacaq.

Məlumatlara görə, “iPhone 18 Pro” və “Pro Max” modellərinin təqdimatı 2026-cı ilin payızında gözlənilir. Eyni tədbirdə “Apple”ın ilk qatlanan iPhone modelini də təqdim edəcəyi bildirilir. Standart “iPhone 17” modelinin isə 2027-ci ilin yazında çıxacağı iddia olunur.

Samir