Ağıllı telefonunuz tualet oturacağından daha çox bakteriya daşıya bilər. Lakin cihazı təmizləyərkən yanlış üsullardan istifadə etmək ekranın qoruyucu örtüyünə zərər vura bilər.

HİT.az xəbər verir ki, Arizona Universitetinin araşdırmasına görə, ağıllı telefonlar gün ərzində davamlı istifadə olunduğu üçün adi tualet oturacağından orta hesabla 10 dəfə çox bakteriya daşıya bilir. Buna baxmayaraq, təmizləmə zamanı istifadə edilən bəzi kimyəvi maddələr cihazın uzunömürlülüyünü azalda bilər.

Mütəxəssislərin sözlərinə görə, müasir smartfon ekranlarının üzərində barmaq izi və yağ ləkələrinin yapışmasını azaldan oleofob (yağ itələyici) qoruyucu örtük mövcuddur. Xlor tərkibli ağardıcılar, ammonyak və ya yüksək konsentrasiyalı spirt məhlulları bu örtüyü zamanla sıradan çıxara bilər. Nəticədə ekran daha tez çirklənir və görüntü keyfiyyəti pisləşir.

Telefonu təhlükəsiz şəkildə təmizləmək üçün aşağıdakı üsullar tövsiyə olunur:

* Mikrofiber parça və yumşaq sabunlu su. Ən təhlükəsiz üsullardan biri yüngülcə nəmləndirilmiş mikrofiber parçaya az miqdarda yumşaq sabun çəkərək ekranı ehtiyatla silməkdir.
* Spirt tərkibli salfetlər. Tərkibində ən azı 70 faiz spirt olan salfetlərdən istifadə etmək olar. Mayeni birbaşa telefona püskürtmək olmaz, əvvəlcə parçaya və ya salfetə tətbiq edilməlidir.
* Ultrabənövşəyi (UV) işıqla dezinfeksiya. UV dezinfeksiya cihazları ekranı zədələmədən bakteriyaların 99,99 faizini məhv edə bilir.

İdeal təmizləmə qaydası iki mərhələdən ibarətdir. İlk olaraq mikrofiber parça ilə ekran üzərindəki toz, ləkə və barmaq izləri təmizlənir. Daha sonra telefon UV dezinfeksiya cihazında emal edilərək bakteriyalardan dərin şəkildə təmizlənir.

Mütəxəssislər bildirirlər ki, bu yanaşma həm cihazın oleofob örtüyünü qoruyur, həm də onun gigiyenik vəziyyətini təmin edir. Eyni zamanda ekran qoruyucusu seçərkən də oleofob örtüyə malik məhsullara üstünlük verilməsi tövsiyə olunur.

Samir