Robot tozsoranlar artıq bir çox evdə gündəlik təmizliyi asanlaşdıran cihazlardan birinə çevrilib. Onlar müntəzəm təmizliyi minimum insan müdaxiləsi ilə həyata keçirə bilir. 

HİT.az xəbər verir ki, "Better Homes & Gardens" portalının ekspertləri 2026-cı il üçün qiymət və keyfiyyət baxımından ən uğurlu modellərin siyahısını hazırlayıblar.

Qiymət və keyfiyyət üzrə ən yaxşı model

Reytinqə "iRobot Roomba Plus 405 Combo" başçılıq edir. Modelin qiyməti 15-20 min qrivna arasında dəyişir.

Cihaz həm quru, həm də nəm təmizləməni effektiv yerinə yetirir, otaqların xəritəsini sürətlə tərtib edir, əksər maneələri dəqiq müəyyənləşdirərək onlardan yayınır. Bundan əlavə, toz konteynerini və yuma modulunu avtomatik təmizləyir.

Model toz, heyvan tükü, saç və xırda zibilləri asanlıqla toplayır. Döşəməni yuduqdan sonra isə demək olar ki, nəm izləri qoymur. Ekspertlər hesab edirlər ki, texnologiyadan çox anlayışı olmayan istifadəçilər üçün bu model uğurlu seçimdir.

Ən yaxşı büdcə modeli

Daha sərfəli variant axtaranlar üçün "Xiaomi Mi Robot Vacuum-Mop 2 Pro" (6-10 min qrivna) tövsiyə olunur.

Model gündəlik təmizliyi uğurla yerinə yetirir, çarpayı və divanların altına rahat daxil olur, otağın xəritəsini yaradır və mobil tətbiq vasitəsilə idarə oluna bilir.

Bununla belə, iri zibilin yığılmasında zəif nəticə göstərir və alçaq mebellərin altında və ya maneələrin yaxınlığında bəzən ilişə bilir.

Müxtəlif ehtiyaclar üçün ən yaxşı modellər

Nəm təmizləmə üçün

"Dreame X50 Ultra" (35-45 min qrivna) döşəmənin yuyulması baxımından ən uğurlu model hesab edilir.

Robot yuyucu örtükləri özü təmizləyir, təmiz və çirkli su üçün ayrıca çənlərdən istifadə edir. Çıxarıla bilən fırça və mop sistemi sayəsində divar kənarlarını və küncləri daha keyfiyyətli təmizləyir.

Heyvan tükü üçün

Ev heyvanı saxlayanlar üçün "Shark PowerDetect" (14-19 min qrivna) tövsiyə edilir.

Model heyvan tükünü, saçları, qumu və digər xırda çirkləri asanlıqla toplayır. Avtomatik təmizləmə sistemi və böyük su-toz çənləri sayəsində ona təxminən ayda bir dəfə qulluq etmək kifayət edir. Yalnız çox yapışqan çirkləri təmizləməkdə çətinlik çəkə bilər.

Xalılar üçün

Xalılı evlər üçün ən uyğun model "Roborock Qrevo Curv" (27-33 min qrivna) seçilib.

Robot xalının üzərinə çıxdıqda sorulma gücünü avtomatik artırır və xovun dərinliyindəki tozla saçları effektiv şəkildə təmizləyir. O, otaqların dəqiq xəritəsini qurur, qadağan olunmuş zonaları yadda saxlayır və toplanmış zibili 90 günədək boşaltmadan saxlaya bilir.

Samir