Tokio polisi anime üzrə ixtisaslaşmış "Bandai Channel" yayım saytına kiberhücum təşkil etməkdə şübhəli bilinən 15 yaşlı məktəblini saxlayıb. Hücum nəticəsində 46 min istifadəçi hesabı məcburi şəkildə silinib. 

HİT.az xəbər verir ki, bu barədə "Asahi" nəşri yazır.

Yeniyetmə xidmətin şəbəkə trafikini araşdırıb, boşluq aşkar edib və ChatGPT-nin köməyi ilə zərərli proqram hazırlayıb. Həmin proqram avtomatik olaraq digər istifadəçilərin hesablarına giriş əldə edib və abunəliyin ləğvi prosesini başladıb.

Hücum 2025-ci ilin noyabrında, təqsirləndirilən şəxsin orta məktəbin üçüncü sinfində oxuduğu vaxt baş verib.

Zərərin miqyası o qədər böyük olub ki, "Bandai Channel" bir ay ərzində fəaliyyətini dayandırıb. Bu müddət ərzində şirkət hücumun nəticələrini aradan qaldırıb və zərər çəkmiş abunəçilərə ödənişləri geri qaytarıb.

Hücum nəticəsində istifadəçilərin elektron poçt ünvanları və ləqəbləri sızıb, lakin indiyədək onların istifadəsi ilə bağlı hər hansı hal qeydə alınmayıb.

Dindirilmə zamanı məktəbli günahını etiraf edib və proqramlaşdırmanı müstəqil şəkildə öyrəndiyini, eyni zamanda hakerliyə maraq göstərdiyini bildirib. O, məhz bu xidmətə qarşı xüsusi narazılığının olmadığını, sadəcə sistemin asan əlçatan olmasından istifadə etdiyini deyib.

Qeyd olunur ki, bu, son yarım il ərzində Yaponiyada baş verən ikinci belə hadisədir. Hər iki insidenti bir tendensiya birləşdirir: yeniyetmələr əvvəllər daha çox vaxt və bacarıq tələb edən hücumlar üçün çat-botlardan alət kimi istifadə etməyə başlayırlar.

Samir