Evdən bir-iki günlük ayrılan bəzi insanlar təhlükəsizlik və elektrik enerjisinə qənaət məqsədilə demək olar ki, bütün elektrik cihazlarını rozetkadan çıxarırlar. Lakin mütəxəssislərin fikrincə, bu yanaşma bütün məişət texnikası üçün doğru deyil.

Hit.az-ın məlumatına görə, "Martha Stewart" portalının ekspertləri bildirirlər ki, bəzi kiçik elektrik cihazlarını istifadədən sonra şəbəkədən ayırmaq məqsədəuyğundur. Lakin iri məişət texnikası adətən daimi elektrik təchizatı üçün nəzərdə tutulub və tez-tez şəbəkədən ayrılması onların xidmət müddətini azalda bilər.

Hansı cihazları rozetkadan çıxarmaq lazım deyil?

Paltaryuyan maşın

Paltaryuyan maşınlar yüksək güclü rozetkalar və ya birbaşa elektrik şəbəkəsi vasitəsilə qoşulur. Onların tez-tez rozetkadan çıxarılması həm fişin, həm də rozetkanın daha tez köhnəlməsinə səbəb ola bilər.

Bundan əlavə, müasir modellər xidmət məlumatlarını yadda saxlayır və özünü diaqnostika funksiyasına malik olur. Elektrik kəsildikdən sonra bəzi parametrlər silinə bilər və onları yenidən qurmaq lazım gələr.

Soyuducu

Soyuducu fasiləsiz işləmək üçün nəzərdə tutulub. Hətta qısa müddətlik söndürüldükdə daxildə temperatur sürətlə yüksəlir və ərzaqlar xarab ola bilər.

Bundan başqa, yenidən işə salındıqdan sonra kompressor daha intensiv işləyir ki, bu da həm elektrik sərfiyyatını, həm də hissələrin yüklənməsini artırır.

Qabyuyan maşın

Qabyuyan maşınlar da daimi elektrik təchizatı üçün layihələndirilib. Onların elektron sistemi cihazın parametrlərini yadda saxlayır və işini nəzarətdə saxlayır.

Gözləmə rejimində enerji sərfiyyatı çox az olduğundan, onu mütəmadi olaraq rozetkadan çıxarmaq ciddi qənaət təmin etmir.

Mikrodalğalı soba

Müasir mikrodalğalı sobalar gözləmə rejimində cüzi miqdarda elektrik enerjisi sərf edir. Əvəzində onları davamlı olaraq şəbəkədən ayırmaq fiş və rozetkanın aşınmasını sürətləndirir, həmçinin bəzi modellərdə saatın hər dəfə yenidən qurulmasını tələb edir.

"Wi-Fi" marşrutlaşdırıcısı və ya modem

İnternet bağlantısının sabit qalması üçün bu cihazları zərurət olmadıqca söndürmək tövsiyə edilmir. Tez-tez yenidən işə salınmaları enerji blokunun ömrünü qısalda və rabitədə fasilələr yarada bilər.

Mütəxəssislərin sözlərinə görə, marşrutlaşdırıcını yalnız nasazlığın aradan qaldırılması zərurəti yarandıqda söndürmək məqsədəuyğundur.

Kondisioner

Müasir kondisionerlər qeyri-aktiv vəziyyətdə də əvvəlcədən təyin olunmuş temperaturu saxlaya bilir. Bəzi modellər eyni zamanda havanın rütubətini tənzimləyir və onu təmizləyir.

Elektrik təchizatının tez-tez kəsilməsi bu sistemlərin iş səmərəliliyini azalda bilər.

Su qızdırıcısı

Boylerlər gün ərzində uzunmüddətli fasiləsiz işləmək üçün nəzərdə tutulub. Onları tez-tez söndürmək suyun temperaturunun qeyri-sabit olmasına və elektrik sərfiyyatının artmasına səbəb ola bilər.

Bununla belə, cihazların rozetkadan ayrılıb-ayrılmaması evdən nə qədər müddətə uzaq qalacağınızdan da asılıdır. Əgər səfər bir həftədən çox davam edəcəksə, mütəxəssislər ehtiyat tədbiri olaraq iri məişət texnikasını da elektrik şəbəkəsindən ayırmağı, hətta mümkün olduqda evin ümumi elektrik təchizatını söndürməyi tövsiyə edirlər.

Samir