Smartfon istifadəçilərinin əksəriyyəti cihaz enerji yığarkən də yazışır, video izləyir və ya sosial şəbəkələrdən istifadə etməyə davam edir. Ekspertlər bildirirlər ki, müasir smartfonlar belə istifadə üçün nəzərdə tutulsa da, bunu daimi vərdişə çevirmək məsləhət görülmür.

HİT.az xəbər verir ki, mütəxəssislərin sözlərinə görə, keyfiyyətli enerji adapteri və kabeldən istifadə edildiyi halda, smartfondan enerji yığarkən istifadə etmək təhlükəsizdir. Müasir cihazlar batareyanın doldurulması ilə yanaşı, işləyən komponentlərin enerji ilə təmin olunmasına imkan verən qoruyucu sistemlərlə təchiz olunub.

Bununla belə, bu vərdişin bir sıra mənfi tərəfləri var.

Əsas problem cihazın daha çox qızmasıdır. Batareya enerji yığarkən özü də istilik yaradır. Eyni vaxtda tətbiqlərin işlədilməsi, oyun oynanılması və ya video izlənilməsi prosessorun yükünü artırır və nəticədə smartfon daha da qızır. Məhz yüksək temperatur litium-ion batareyaların daha sürətlə köhnəlməsinin əsas səbəblərindən biri hesab olunur.

Digər mənfi cəhət enerji yığma prosesinin ləngiməsidir. Çünki daxil olan enerjinin bir hissəsi batareyanın doldurulmasına deyil, ekranın, prosessorun və digər komponentlərin işləməsinə sərf olunur. Nəticədə smartfonun tam enerji yığması daha çox vaxt aparır.

Ekspertlər qeyd edirlər ki, qısa müddət ərzində smartfondan enerji yığarkən istifadə etmək təhlükəli deyil. Lakin söhbət oyun oynamaq, video çəkmək və ya uzun müddət video izləmək kimi yüksək resurs tələb edən əməliyyatlardan gedirsə, enerji yığma prosesi başa çatdıqdan sonra istifadə etmək daha məqsədəuyğundur. Bu, cihazın qızmasının qarşısını almağa və batareyanın istismar müddətini uzatmağa kömək edir.

Xüsusilə simsiz enerji yığma zamanı daha ehtiyatlı olmaq tövsiyə olunur. Bu üsul naqilli enerji yığma ilə müqayisədə daha çox istilik yaradır və həmin vaxt telefondan istifadə korpusun temperaturunu daha da yüksəldir.

Mütəxəssislər bildirirlər ki, təcili ehtiyac yoxdursa, enerji yığma zamanı smartfonu istifadə etmədən saxlamaq daha məqsədəuyğundur. Üstəlik, sürətli enerji yığmanı dəstəkləyən müasir smartfonlar təxminən 30 dəqiqə ərzində batareyanın 50 faizini doldura bilir və bundan sonra cihazdan batareyaya əlavə yük yaratmadan rahat istifadə etmək mümkündür.

Bundan əvvəl mütəxəssislər enerji yığma kabelinin uzunluğunun doldurma sürətinə təsir edib-etmədiyini də araşdırıblar. Onların qənaətinə görə, kabelin uzunluğundan daha vacib amil onun keyfiyyətidir.

Bundan başqa, "Samsung" şirkəti 2027-ci ildən bərk elektrolitli batareyaların kütləvi istehsalına başlamağı planlaşdırdığını açıqlayıb. Sənayedə "xəyal batareyası" adlandırılan bu texnologiyanın smartfonların enerji ehtiyatını artıracağı, doldurma müddətini qısaldacağı və alışma riskini demək olar ki, aradan qaldıracağı gözlənilir.

Samir