"SpaceX" ilə işləyən ABŞ Müdafiə Nazirliyinin nümayəndələri Rusiya hərbçiləri tərəfindən "Starlink" peyk rabitə terminallarından qanunsuz istifadənin qarşısını ala biliblər.

HİT.az xəbər verir ki, bu barədə "Bloomberg" məlumat yayıb.

Agentliyin sitat gətirdiyi Kosmik Siyasət üzrə Nazirin köməkçisi Con Plumb bildirib ki, ABŞ Rusiyanın "Starlink" terminallarından qeyri-qanuni istifadəsinə qarşı mübarizə aparmaq üçün Ukrayna hökuməti və "SpaceX" şirkəti ilə əməkdaşlıqda fəal iştirak edir.

"Biz Rusiya hərbçiləri tərəfindən terminalların istifadəsini uğurla dayandırdıq, lakin əminəm ki, Rusiya bundan sonra da "Starlink" xidmətlərindən və digər kommersiya kommunikasiya sistemlərindən istifadə yollarını tapmağa çalışacaq", deyə Plumb bildirib.

Onun sözlərinə görə, həm "Starlink" ilə, həm də Ukrayna ilə yaxşı həll yolları tapmaq mümkün olub.

Qeyd olunur ki, "Starlink" terminallarının Rusiya Federasiyasında "Ozon" elektron ticarət saytı kimi platformalarda satış üçün reklamı davam edir. Satıcılar iddia edirlər ki, abunə bu texnologiyanın lisenziyalaşdırıldığı Avropa ölkələrinin sakinlərinə verilə bilər. Sistem Rusiya Federasiyası ərazisinin dərinliklərində işləməsə də, sərhədyanı rayonların yaxınlığında, xüsusən də Ukraynanın işğal olunmuş ərazilərində rabitəni saxlamaq mümkün olacaq.

Qeyd edək ki, Ukrayna Müdafiə Nazirliyinin Baş Kəşfiyyat İdarəsi cəbhədə rusların "Starlink" peyk rabitə sistemlərindən istifadəsinin artdığını təsdiqləyib.

"SpaceX"in sahibi İlon Mask bildirib ki, şirkət Rusiya Federasiyasına heç bir "Starlink" terminalı satmayıb.

ABŞ Konqresinin Nümayəndələr Palatasındakı Demokratlar Partiyasının nümayəndələri Rusiya hərbçilərinin "Starlink" peyk internet xidmətindən istifadə etməsi ilə bağlı "SpaceX" ilə bağlı araşdırmaya başlayıblar.

Samir