Yay aylarında bir çox insan otağı daha tez sərinlətmək üçün kondisioneri minimum temperatura – 16-18 dərəcəyə qədər endirir. Lakin mütəxəssislər bildirirlər ki, bu yanaşma həm enerji sərfiyyatını artırır, həm də cihazın üzərinə əlavə yük salır.
HİT.az xəbər verir ki, "Real Simple" nəşrinin yazdığına görə, ABŞ Energetika Nazirliyinin mütəxəssisləri isti havalarda kondisionerin 24-26°C temperaturda işləməsini tövsiyə edirlər. Evdə heç kim olmadıqda isə temperaturu bir qədər yüksəltmək elektrik enerjisinə qənaət etməyə kömək edir.
"Oncourse Home Solutions" şirkətinin istilik, havalandırma, kondisioner və su təchizatı sistemləri üzrə şöbə rəhbəri Elizabet Şeyvers bildirir ki, əsas məqsəd "ideal" temperaturu tapmaq deyil, otaqda sabit temperaturu qorumaqdır.
Onun sözlərinə görə, temperaturun tez-tez dəyişdirilməsi kondisionerin daha çox işləməsinə səbəb olur və enerji sərfiyyatını artırır.
"ENERGY STAR" proqramının mütəxəssisləri də boş mənzilin lazımsız yerə soyudulmamasını tövsiyə edirlər. Gün ərzində evdə heç kim olmadıqda temperaturu təxminən 4 dərəcə artırmaq məqsədəuyğun hesab edilir.
Gecə saatlarında da, əgər rahatlıq hissi pozulmursa, kondisioneri çox aşağı temperatura qoymamaq məsləhət görülür. Bu, cihazın daha az elektrik sərf etməsinə imkan yaradır.
Mütəxəssislər taymer və ya proqramlaşdırılan termostat funksiyasından istifadə etməyi də tövsiyə edirlər. Bu halda kondisioner evə qayıtmazdan və ya oyanmazdan qısa müddət əvvəl avtomatik işə düşərək otağı sərinlədir.
Bundan əlavə, otağın daha tez soyuması üçün kondisioneri minimum temperatura endirmək effektiv üsul sayılmır. Bu, soyutma prosesini sürətləndirməsə də, enerji sərfiyyatını artırır və avadanlığın istismar yükünü yüksəldir.
Mütəxəssislər isti havalarda evi sərin saxlamaq üçün aşağıdakı tövsiyələri də verirlər:
* Kondisionerə mütəmadi texniki xidmət göstərin və hava filtrlərini vaxtında dəyişin;
* Gün ərzində pərdə və jalüzləri bağlı saxlayın ki, günəş istiliyi otağa daxil olmasın;
* Tavan və ya döşəmə ventilyatorlarından istifadə edərək hava dövranını yaxşılaşdırın;
* Günün ən isti saatlarında soba, paltarqurudan və digər istilik yaradan məişət cihazlarından mümkün qədər az istifadə edin;
* Havalandırma barmaqlıqlarını mebellə bağlamayın, kondisionerin xarici blokunun ətrafını yarpaq, bitki və zibildən təmiz saxlayın.
Mütəxəssislərin fikrincə, bu sadə tədbirlər evdə daha rahat temperatur yaratmağa, kondisionerin daha səmərəli işləməsinə və elektrik xərclərinin azalmasına kömək edir.
Samir
