“AnTuTu” şirkəti 2026-cı ilin sentyabr ayı üzrə istifadəçilərin ən yüksək qiymət verdiyi iOS cihazlarının reytinqini açıqlayıb. Siyahıda ilk pilləyə “Apple” şirkətinin yeni flaqmanı olan iPhone 18 Pro Max yüksəlib. Smartfon istifadəçilərin 99,02 faizinin müsbət rəyini qazanaraq rəqiblərini geridə qoyub.

HİT.az xəbər verir ki, reytinq cihazların performans testlərinin nəticələrinə deyil, “AnTuTu Benchmark” tətbiqinin istifadəçiləri arasında aparılan qiymətləndirmələrə əsaslanır. Başqa sözlə, siyahı smartfon və planşetlərin texniki gücündən daha çox, sahiblərinin öz cihazlarından nə dərəcədə razı qaldığını əks etdirir.

iPhone 18 Pro Max modelinin yüksək qiymətləndirilməsində onun texniki yeniliklərinin də rol oynadığı bildirilir. Smartfon A20 Pro prosessoru ilə təchiz edilib. Yenilənmiş arxitektura mərkəzi və qrafik prosessorların məhsuldarlığının artırılmasına imkan verir. Bundan əlavə, cihazın 48 meqapiksellik Fusion əsas kamerası dəyişən diafraqma funksiyası ilə təkmilləşdirilib.

Reytinqdə ikinci yeri 96,97 faiz müsbət qiymətləndirmə ilə iPad Air 4 tutub. A14 Bionic prosessoru, 10,9 düymlük ekranı və Touch ID barmaq izi sensoru ilə seçilən planşet yeni nəsil modellərin bazara çıxmasına baxmayaraq, istifadəçilərin rəğbətini qoruyub saxlayır.

İlk üçlüyü isə iPhone 12 mini tamamlayıb. İstifadəçilərin yüksək qiymətləndirdiyi bu model 5,4 düymlük ekranı və cəmi 133 qram çəkisi ilə seçilir. “Apple” şirkətinin iPhone 13 mini-dən sonra kompakt smartfon seriyasının inkişafını davam etdirməməsi bu cihazları bazarda daha nadir modellərə çevirib.

Reytinqin ilk onluğunda beş iPhone və beş iPad modelinin yer alması diqqət çəkib. Nəticələr göstərir ki, istifadəçilər yalnız yeni nəsil cihazlardan deyil, təxminən 5-6 il əvvəl satışa çıxarılan “Apple” məhsullarından da razıdırlar.

Samir