Microsoft-un köhnə əməliyyat sistemi Windows 7 müasir kompüterdə keçirilən oyun testlərində Windows 11-i bəzi göstəricilərə görə üstələyib. Nəticələr göstərib ki, 2009-cu ildə təqdim edilən əməliyyat sistemi xüsusilə prosessorun daha çox yükləndiyi oyunlarda üstünlük əldə edə bilir. Bununla belə, qrafik kartına yüksək tələblər qoyan oyunlarda Windows 11 daha yaxşı nəticələr göstərib.
HİT.az xəbər verir ki, bu barədə “Tom’s Hardware” nəşri məlumat yayıb.
Sınaqlar AMD Ryzen 7 9800X3D prosessoru, Radeon RX 6950 XT videokartı və 64 GB operativ yaddaşla təchiz edilmiş müasir oyun kompüterində aparılıb. Testlərdə ümumilikdə 10 oyun yoxlanılıb. Onlardan səkkizi DirectX 11, ikisi isə DirectX 9 texnologiyasından istifadə edib.
Nəticələrə əsasən, Windows 7 xüsusilə köhnə oyunlarda nəzərəçarpacaq üstünlük nümayiş etdirib. Məsələn, “Batman: Arkham Asylum” və “Borderlands 2” oyunlarında Full HD təsvir ölçüsündə iki əməliyyat sistemi arasındakı performans fərqi 30 faizdən çox olub. “Batman: Arkham Origins” oyununda da Windows 7 həm orta kadr tezliyi, həm də görüntünün sabitliyi baxımından daha yaxşı nəticələr göstərib.
Mütəxəssislər bu fərqi Windows 11-in bəzi köhnə oyunları müasir qrafik texnologiyalarına uyğunlaşdırmaq üçün əlavə proqram qatından istifadə etməsi ilə əlaqələndirirlər. Bu proses prosessorun üzərinə əlavə yük sala bilər. Windows 7 isə həmin oyunları daha birbaşa şəkildə işə saldığı üçün bəzi hallarda daha yüksək məhsuldarlıq təmin edir.
Windows 11 hansı oyunlarda üstün olub?
Araşdırmada Windows 11-in də üstünlükləri üzə çıxıb. Videokartın daha çox yükləndiyi “Batman: Arkham City”, “Control” və “Hitman 2” oyunlarında yeni əməliyyat sistemi daha yaxşı nəticələr göstərib. “The Witcher 3: Wild Hunt” oyununda isə göstəricilər ekranın təsvir ölçüsündən asılı olaraq dəyişib.
Müəlliflər fərqin yaranmasını əməliyyat sistemlərinin sürücü arxitekturası və prosessor resurslarından istifadə üsulu ilə izah edirlər. Windows 11-in daha müasir qrafik sürücüləri üstünlük yaratsa da, fon xidmətləri və telemetriya kimi proseslər bəzi hallarda əlavə hesablama resursları tələb edə bilər.
Bununla belə, nəticələr Windows 7-nin ümumilikdə Windows 11-dən daha yaxşı olması demək deyil. Sınaqlar yalnız müəyyən oyunları və konkret kompüter konfiqurasiyasını əhatə edib. Üstəlik, Windows 7 artıq təhlükəsizlik yeniləmələri ilə dəstəklənmir. Buna görə də oyunlarda əldə edilən bəzi üstünlüklər köhnə əməliyyat sisteminə qayıtmaq üçün kifayət qədər əsas sayılmır.
Samir
