Restoranlarda oğurluq halları təkcə yemək və içkilərlə məhdudlaşmır. Restoran sahiblərinin sözlərinə görə, bəzi müştərilər müəssisənin dekorasiyasından tutmuş qab-qacağa qədər müxtəlif əşyaları özləri ilə aparırlar. Kiçik əşyaların oğurlanması ayrı-ayrılıqda böyük zərər yaratmasa da, zamanla restoran üçün ciddi xərcə çevrilə bilər.

HİT.az xəbər verir ki, bu barədə "Mashed" saytı yazır.

Restoran sənayesi üzrə mütəxəssislərin açıqlamalarına əsasən, ən çox oğurlanan əşyalar bunlardır:

1. Lampalar

Restorandan lampanı götürmək ilk baxışda çətin görünsə də, belə hallar baş verir. Xüsusilə orijinal dizaynlı masa lampaları və hətta açıq havada istifadə olunan işıqlandırma vasitələri oğurlanır. Restoran sahibləri bunun səbəbini bəzi dekorativ əşyaların müştərilərə ev üçün cəlbedici görünməsi ilə əlaqələndirirlər.

2. Salfetlər və salfet üzükləri

Xüsusilə bahalı restoranlarda istifadə olunan keyfiyyətli parça salfetlər və dekorativ salfet üzükləri də müştərilərin diqqətini çəkir. Bəzi restoranlarda qeyri-adi dizayna malik aksessuarların oğurlanması tez-tez müşahidə olunur.

3. Şamlar

Kiçik, dekorativ və asanlıqla çantaya yerləşdirilə bilən şamlar da restoranlardan aparılan əşyalar arasındadır. Bəzi hallarda müştərilər hətta yanan şamları götürməyə çalışırlar. Restoran sahibləri aromatik difuzorların da bəzən oğurlandığını bildirirlər.

4. Şərab qədəhləri

Şərab və kokteyl qədəhləri restoranlardan ən çox aparılan əşyalardan biridir. Xüsusilə qeyri-adi formada və orijinal dizaynda olan qədəhlər müştərilər üçün suvenirə çevrilir. Onların kiçik ölçülü olması isə gizlədilməsini asanlaşdırır.

5. Steyk bıçaqları

Keyfiyyətli steyk bıçaqları adi mətbəx bıçaqlarından daha bahalı ola bilər. Möhkəm tutacaqları, keyfiyyətli materialları və fərqli dizaynları onları bəzi müştərilər üçün cəlbedici edir. Restoran sahibləri bu cür bıçaqların mütəmadi olaraq itdiyini bildirirlər.

6. Espresso qaşıqları

Kiçik ölçülü espresso qaşıqları da tez-tez restoranlardan aparılır. Xüsusilə gümüş, üzərində yazı olan və ya xüsusi dizayn edilmiş qaşıqlar müştərilərin diqqətini çəkir. Onları çantaya və ya cibə qoymaq isə çox asandır.

7. Qeyri-adi dekor əşyaları

Ən təəccüblü oğurluq halları restoranın interyerinin bir hissəsi olan unikal əşyalarla bağlıdır. Sənət əsərləri, antik qablar, dekorativ aksessuarlar və digər eksklüziv əşyalar bəzən müəssisədən yoxa çıxır.

Belə hallardan biri ABŞ-ın İndianapolis şəhərindəki restoranlardan birində baş verib. Restoranın dekorasiyasının bir hissəsi olan doldurulmuş tülkü oğurlanıb. Müəssisə onun qaytarılması üçün mükafat vəd edib və bir müddət sonra heyvan anonim şəkildə restorana geri göndərilib.

Restoran sahibləri bildirirlər ki, əsas problem əşyanın qiymətindən çox, onun unikal olmasıdır. Xüsusi dizayn edilmiş bir əşyanın itirilməsi restoranı həm əlavə xərcə, həm də interyer konsepsiyasının pozulmasına səbəb ola bilər.

Samir