Alimlər bəzi insanların pişikləri sözün əsl mənasında özlərinə cəlb etməsinin, digərlərinə isə heyvanların yaxınlaşmamasının səbəbini araşdırıblar. 

HİT.az-ın məlumatına görə, "BBC Science Focus" bir sıra tədqiqatlara istinadən yazır ki, pişiklər haqqında formalaşmış tənhalığı sevən heyvan obrazına baxmayaraq, onlar əslində çox vaxt insanlarla ünsiyyəti özləri seçirlər.

Ev və sığınacaq pişiklərinin iştirakı ilə aparılan, 50 heyvanın daxil olduğu bir araşdırmada pişiklərin əksəriyyəti yemək və ya oyuncaqlardan çox insanın yanında olmağa üstünlük verib.

Pişiklərin qoxu hissi olduqca həssasdır və onlar sahibinin qoxusunu yad insanın qoxusundan asanlıqla ayırd edə bilirlər. Təcrübə zamanı heyvanlara sahibinin və tanımadıqları şəxsin qoxusunu daşıyan parçalar verilib. Pişiklər yad insanın qoxusunu daha uzun müddət iyləyiblər ki, bu da onların tanış insanları qoxu vasitəsilə yaxşı tanıdığını göstərir.

Pişiklər insanın qorxusunu hiss edə bilir

Pişiklər insanın emosional vəziyyətini tər vasitəsilə də müəyyən edə bilirlər. Bir təcrübədə heyvanlara xoşbəxtlik, qorxu, stress və sakitlik vəziyyətində olan insanların tər nümunələri iylədilib.

Qorxu qoxusu pişiklərdə mənfi reaksiya yaradıb. Onlar qulaqlarını geriyə yatırıblar, quyruqlarını tərpədiblər, gərginləşiblər və uzaqlaşmağa çalışıblar. Buna görə də qorxmuş və ya gərgin insanın yanına pişiyin yaxınlaşmaq istəməsi ehtimalı azdır.

İnsanın xarakteri və heyvanla davranış tərzi də əhəmiyyətlidir. 119 iştirakçının pişik sığınacağında heyvanlarla ünsiyyət saxladığı araşdırmada alimlər müəyyən ediblər ki, daha yüksək narahatlıq səviyyəsinə malik insanlar heyvanlara qarşı daha çox nəzarətçi davranır və pişiklərin verdiyi siqnalları daha pis anlayırlar.

Əsl "pişik maqnitləri" adlandırıla biləcək insanlar isə adətən daha az narahat olur və heyvanlara daha çox hörmətlə yanaşırlar.

Pişiklərin öz xarakteri də rol oynayır

Seçim yalnız insandan asılı deyil. Pişiklərin özləri də xarakter və davranış baxımından bir-birindən fərqlənirlər.

2022-ci ildə aparılan pilot araşdırmada insanlara pişik kafesində və ya sığınacaqda sadəcə oturaraq heyvanlarla iki saat ünsiyyətdə olmaq imkanı verilib. Bu müddətdə tədqiqatçılar pişiklərin davranışlarını müşahidə edib və onların sidik nümunələrini analiz ediblər.

Nəticədə testosteron səviyyəsi daha aşağı olan erkək pişiklərin, eləcə də erkən yaşlarından insanlarla yaşayan heyvanların daha mehriban davrandığı müəyyən edilib.

Beləliklə, pişikləri "ovsunlamaq" anadangəlmə istedad deyil. Heyvanın siqnallarını düzgün anlamaq, ona hörmətlə yanaşmaq və şəxsi sərhədlərini pozmamaqla bu bacarığı inkişaf etdirmək mümkündür.

Samir