Məktəb yalnız biliklərin öyrədildiyi məkan deyil.

Bura uşaqların intizam, məsuliyyət, qarşılıqlı hörmət və ümumi qaydalara riayət etmək vərdişləri qazandığı mühitdir. Bu baxımdan, məktəblilərin geyimi ilə bağlı müəyyənləşdirilən tələblər də təkcə xarici görünüşə deyil, məktəb mühitində vahid yanaşmanın formalaşmasına xidmət edir.

Son günlər məktəblərdə vahid geyimlə bağlı müzakirələrin yenidən gündəmə gəlməsi bu məsələyə daha geniş prizmadan baxmağı zəruri edir. Digər tərəfdən, makiyajlı şagirdin məktəbə buraxılmaması ilə bağlı müzakirələr də göstərir ki, məktəbli geyimi və görünüşü məsələsi yalnız bir geyim elementi ətrafında məhdudlaşmır.

Əgər məktəbli geyimi və xarici görünüşlə bağlı tələblər rəsmi qaydalarla müəyyən edilibsə, həmin tələblərin tətbiqində ardıcıllıq və aydınlıq olmalıdır. Qaydanın yalnız bir şagirdə münasibətdə xatırlanması, digər hallarda isə nəzərə alınmaması ədalətlilik barədə suallar yarada bilər. Eyni zamanda, hər hansı şagirdə münasibətdə qərar verilərkən qaydanın konkret məzmunu, tətbiq dairəsi və nəzərdə tutulan prosedur əsas götürülməlidir.

Qaydalara hörmət onların hamıya eyni yanaşma ilə tətbiqindən başlayır. Bu prinsip hicabla bağlı məsələdə də, makiyaj və digər görünüş tələbləri ilə bağlı hallarda da əhəmiyyət daşıyır. Hər məsələ müvafiq hüquqi çərçivədə qiymətləndirilməli, qərarlar şəxsi münasibətlərə deyil, aydın və əvvəlcədən məlum olan tələblərə əsaslanmalıdır.

Valideynlərin də bu məsələdə məsuliyyəti az deyil. Övladın şəxsi seçimlərinə hörmətlə yanaşmaqla yanaşı, onun təhsil aldığı müəssisənin qaydalarını bilməsi və anlaması üçün dəstək göstərilməlidir. Məktəblə valideyn arasında qarşıdurma deyil, qarşılıqlı anlaşma formalaşmalıdır.

Nəticə etibarilə, məktəbli geyimi ilə bağlı müzakirələrin yalnız hicab və ya makiyaj üzərində qurulması məsələnin əsas mahiyyətini kölgədə qoya bilər. Əsas məsələ qaydaların nə dərəcədə aydın olması, necə izah edilməsi və bütün şagirdlərə münasibətdə nə qədər ardıcıl tətbiq olunmasıdır.

Çünki məktəbdə nizam yalnız qadağalarla deyil, ədalətli yanaşma, aydın meyarlar və qarşılıqlı hörmətlə formalaşır. Qayda hamı üçün nəzərdə tutulubsa, onun tətbiqi də şəxslərə görə deyil, müəyyən edilmiş hüquqi çərçivəyə görə həyata keçirilməlidir.

Sevinc