Telefonu avtomobildə şarj etmək üçün ən çox istifadə olunan üsullardan biri 12 voltluq rozetkaya xüsusi adapter qoşmaqdır. Lakin şarjın sürətinə əsasən məhz adapter təsir edir. Köhnə və ya keyfiyyətsiz adapterlər smartfona kifayət qədər enerji ötürməyə bilər.

HİT.az xəbər verir ki, bu barədə BGR yazıb.

Əsas səbəb adapter ola bilər

Mütəxəssislər bildirirlər ki, avtomobil üçün şarj cihazı seçərkən onun dəstəklədiyi gücə diqqət etmək lazımdır. Müasir modellərdə USB-C və USB-A portlarının olması, həmçinin USB Power Delivery (PD) və Qualcomm Quick Charge kimi sürətli şarj texnologiyalarının dəstəklənməsi vacibdir.

Buna görə telefon avtomobildə çox yavaş şarj olunursa, ilk növbədə adapteri dəyişmək məsləhətdir. Keyfiyyətli və smartfonun tələb etdiyi gücü təmin edən cihaz seçilməlidir.

USB kabeli də sürətə təsir edir

Problemin digər səbəbi köhnə və keyfiyyətsiz USB kabeli ola bilər. İllərlə istifadə olunan və ya ucuz kabellər müasir smartfonların sürətli şarj imkanlarından tam istifadə etməyə imkan vermir.

Yeni kabel seçərkən onun yüksək gücü dəstəkləməsinə diqqət yetirmək tövsiyə olunur. iPhone istifadəçiləri üçün isə uyğun sertifikatlı kabel seçilməsi də önəmlidir.

Telefonun özü də enerjini sərf edir

Şarj zamanı ekranın açıq qalması, yüksək parlaqlıq, mobil internet, GPS və digər funksiyalar batareyanın enerjisini sərf edir. Nəticədə telefona daxil olan enerji ilə sərf olunan enerji arasındakı fərq azalır və şarj prosesi daha yavaş görünür.

Bu səbəbdən avtomobildə telefonu daha sürətli doldurmaq üçün keyfiyyətli adapter və kabeldən istifadə etmək, mümkün olduqda ekran parlaqlığını azaltmaq və lazımsız funksiyaları söndürmək tövsiyə olunur.

Yəni telefonun avtomobildə yavaş şarj olmasının səbəbini dərhal avtomobildə axtarmaq lazım deyil. Çox vaxt problem sadəcə köhnə adapter və ya USB kabelindən qaynaqlanır.

Samir