Gündəlik qəbul etdiyimiz içkilər arterial təzyiqə düşündüyümüzdən daha çox təsir göstərə bilər. Diyetoloqlar ürək-damar sağlamlığını qorumaq və yüksək təzyiqin tənzimlənməsinə dəstək olmaq üçün dörd içkiyə diqqət çəkiblər. Siyahıya nar şirəsi, yaşıl çay, hibiskus çayı və çuğundur şirəsi daxildir.

HİT.az xəbər verir ki, bu barədə “Verywell Health” məlumat yayıb.

1. Nar şirəsi

Nar şirəsi tərkibindəki kalium və antioksidantlarla arterial təzyiqin tənzimlənməsinə kömək edə bilər. Mütəxəssislərin sözlərinə görə, bu içkinin tərkibindəki faydalı maddələr orqanizmdə azot oksidinin istehsalını dəstəkləyir. Bu maddə qan damarlarının genişlənməsinə və qan dövranının yaxşılaşmasına şərait yaradır.

Diyetoloq Syuzan Fişer nar şirəsini yalnız təmiz halda deyil, qazlı su, soyuq çay və smuzilərlə qarışdıraraq da qəbul etməyi tövsiyə edir.

2. Yaşıl çay

Diyetoloq Simone Harunyanın fikrincə, yaşıl çay sağlam arterial təzyiqin qorunmasında faydalı içkilərdən biridir.

Onun tərkibindəki antioksidantlar və iltihabəleyhinə xüsusiyyətlərə malik birləşmələr damarların rahatlamasına və qan dövranının yaxşılaşmasına kömək edə bilər. Mütəxəssis maksimum fayda əldə etmək üçün yaşıl çayı şəkərsiz içməyi məsləhət görür.

Yaşıl çayın tərkibində kofein olduğundan onu səhərlər qəhvəyə alternativ kimi də seçmək mümkündür.

3. Hibiskus çayı

Diyetoloq Lena Bil hibiskus çayını arterial təzyiqin aşağı salınmasına kömək edə bilən təbii içkilərdən biri hesab edir.

Bu çay damarların rahatlamasına və qan dövranının yaxşılaşmasına təsir göstərə bilən antosianlarla zəngindir. Onun sözlərinə görə, hibiskus həm sistolik, həm də diastolik təzyiq göstəricilərinin azalmasına kömək edə bilər.

Mütəxəssis çayı isti və ya soyuq halda, şəkər əlavə etmədən içməyi tövsiyə edir. Dadını yaxşılaşdırmaq üçün limon, digər sitrus meyvələri və ya az miqdarda darçından istifadə etmək olar.

4. Çuğundur şirəsi

Diyetoloq Roksana Ehsaninin diqqət çəkdiyi digər içki çuğundur şirəsidir. Onun sözlərinə görə, çuğundurun tərkibindəki təbii nitratlar orqanizmdə azot oksidinin yaranmasına kömək edərək qan damarlarının genişlənməsini və təzyiqin azalmasını dəstəkləyə bilər.

Bundan əlavə, çuğundur kalium, maqnezium və C vitamini ilə zəngindir. Tərkibindəki antioksidant piqmentlər də ürək-damar sağlamlığı üçün əhəmiyyət daşıyır.

Diyetoloq ev şəraitində çuğunduru yaşıl alma, kök, zəncəfil və limonla birlikdə şirəçəkəndən keçirməyi tövsiyə edir.

Samir