Kəsmik yüksək zülal tərkibi və qida dəyəri ilə seçilsə də, onun hər gün istehlakı bəzi məqamlara diqqət yetirməyi tələb edir. Dietoloqlar sağlam insanların gündəlik qida rasionuna kəsmik əlavə edə biləcəyini, lakin porsiya miqdarına və məhsulun tərkibinə nəzarət etməyin vacibliyini bildirirlər.
HİT.az xəbər verir ki, diyetoloq Roksana Ehsaninin sözlərinə görə, kəsmik orqanizmi yüksək keyfiyyətli zülal, kalsium, kalium və B12 vitamini ilə təmin edir. Məhsulun tərkibindəki faydalı bakteriyalar da həzm sisteminin fəaliyyətinə müsbət təsir göstərə bilər.
Qidalanma mütəxəssisi Lauri Rayt bildirib ki, kəsmik uzun müddət toxluq hissi yaradan məhsullardan biridir. Onun bir porsiyasında təxminən 25 qram zülal olur. Bunun böyük hissəsini yavaş həzm edilən kazein zülalı təşkil edir. Bu xüsusiyyət iştahanın tənzimlənməsinə və yeməklər arasında aclıq hissinin azalmasına kömək edir.
Əzələlər və sümüklər üçün faydalıdır
Diyetoloqların fikrincə, kəsmiyin müntəzəm istehlakı əzələ kütləsinin qorunmasına və bərpasına dəstək verir. Məhsulun tərkibində orqanizm üçün vacib olan doqquz əvəzolunmaz amin turşusu, o cümlədən əzələ zülalının sintezində iştirak edən leysin var.
Kəsmik sümüklərin möhkəmliyi baxımından da əhəmiyyətlidir. Tərkibindəki kalsium, fosfor və zülal sümük toxumasının qorunmasına kömək edir. Mütəxəssislər xüsusilə yaş artdıqca bu maddələrin kifayət qədər qəbul edilməsinin vacibliyini vurğulayırlar.
Bundan başqa, məhsul B12 vitamini ilə zəngindir. Təxminən yarım stəkan kəsmik gündəlik B12 ehtiyacının 20 faizini təmin edə bilər. Bu vitamin sinir sisteminin fəaliyyəti, qırmızı qan hüceyrələrinin yaranması və DNT sintezi üçün vacibdir.
Kimlər kəsmik yeyərkən ehtiyatlı olmalıdır?
Diyetoloqlar sağlam yetkin insanların əksəriyyətinin hər gün kəsmik yeyə biləcəyini bildirirlər. Bununla belə, bəzi qruplar üçün məhsulun istehlakı məhdudlaşdırıla bilər.
- Yüksək təzyiq və ürək çatışmazlığı olanlar: Kəsmiyin bəzi növlərində natriumun miqdarı yüksəkdir. Bir stəkan məhsulda 700-900 mq natrium ola bilər.
- Laktoza dözümsüzlüyü olanlar: Məhsulun tərkibində laktoza olduğundan həzm problemləri yarana bilər.
- Süd zülalına allergiyası olanlar: Kəsmikdə kazein və zərdab zülalı olduğuna görə belə şəxslərə tövsiyə edilmir.
- Xroniki böyrək xəstəliyi olanlar: Zülal, natrium və fosfor qəbuluna məhdudiyyət qoyulan şəxslər istehlak miqdarına diqqət etməlidirlər.
- Xolesterini yüksək olanlar: Yağlı kəsmikdə doymuş yağların miqdarı daha çox olduğundan azyağlı və ya yağsız növlərə üstünlük vermək məqsədəuyğun ola bilər.
Gündə nə qədər kəsmik yemək olar?
Mütəxəssislərin tövsiyəsinə görə, kəsmiyin gündəlik optimal porsiyası təxminən yarım stəkan hesab olunur. Məhsulu giləmeyvə, şaftalı və digər liflə zəngin qidalarla birlikdə qəbul etmək onun qida dəyərini daha da artıra bilər.
Diyetoloqlar rasionda müxtəlifliyə də diqqət yetirməyi məsləhət görürlər. Bu baxımdan kəsmiklə yanaşı, zülal və kalsium mənbəyi olan yunan yoqurtundan da istifadə etmək olar.
Samir
