Almaniyanın avtomobil istehsalçısı “Volkswagen” xərcləri azaltmaq məqsədilə “Golf” modelinin tam elektrik versiyası olan ID. Golf-un hazırlanmasını müvəqqəti dayandırıb. Qərar şirkətin Volfsburqdakı baş qərargahında qəbul edilib.

HİT.az xəbər verir ki, bu barədə “Reuters” məlumat yayıb.

“Volkswagen”in ənənəvi olaraq ən populyar modellərindən biri olan “Golf”un elektrik versiyası ilə bağlı qərar gözlənilməz hesab olunur. Şirkətin kütləvi brendlər bölməsinin rəhbəri Tomas Şefer bildirib ki, modelin həm “Volkswagen”, həm də Volfsburq üçün əhəmiyyətini nəzərə alaraq, bu qərarı vermək asan olmayıb.

Bu addım Avropanın ən böyük avtomobil istehsalçısının üzləşdiyi maliyyə çətinliklərini bir daha üzə çıxarıb. Şirkət 100 min iş yerinin ixtisarı və Almaniyada dördədək zavodun bağlanmasını nəzərdə tutan qənaət planını həyata keçirməyə çalışır. “Volkswagen” son rübdə son on ildən artıq müddətdə ən böyük zərərini açıqlayıb və yenidən strukturlaşma proqramına dəstək istəyib.

Volfsburqdakı zavod isə 300 milyon avroluq xərclərin azaldılması hədəfinə çata bilməyib. Müəssisənin bağlanması nəzərdə tutulmasa da, şirkətin Almaniyadakı bölmələrinə maliyyə yükünü azaltmaq üçün təzyiq artır.

Bununla yanaşı, “Volkswagen”in işçiləri təmsil edən istehsalat şurası ID. Golf-un hazırlanmasının dayandırılmasının modelin bazara çıxarılma tarixini gecikdirməyəcəyini bildirib. Şura isə bu qərarı konsernin maliyyə vəziyyətinin gərginliyini göstərən növbəti siqnal kimi qiymətləndirib.

ID. Golf konsernin gələcək SSP proqram platforması əsasında hazırlanması planlaşdırılan ilk modellərdən biridir. Bütün konsern üçün nəzərdə tutulan bu texnologiya istehsal prosesini sadələşdirməli və xərcləri azaltmalıdır. Platformanın istifadəyə verilməsi əvvəlcə 2026-cı ilə planlaşdırılsa da, artıq təxirə salınıb.

Samir