“Honda”nın tədqiqat və inkişaf bölməsi bərk elektrolitli batareya texnologiyaları ilə tanınan “QuantumScape” ilə uzunmüddətli tərəfdaşlıq qurduğunu açıqlayıb. Şirkət mühəndislərinin Kaliforniyadakı laboratoriyalarda apardığı texniki araşdırmalar bu əməkdaşlığın əsasını təşkil edir.

HİT.az xəbər verir ki, indi diqqətlər litium-ion sistemlərlə müqayisədə daha təhlükəsiz və daha səmərəli hesab olunan yeni nəsil batareya hüceyrələrinə yönəlib.

Bərk elektrolitli texnologiya enerji saxlama sahəsində inqilabi yenilik kimi qiymətləndirilir. Litium-ion batareyalardan fərqli olaraq, bu sistemlər yanğın riskini əhəmiyyətli dərəcədə azaldır və elektrikli avtomobillərə daha uzun yürüş məsafəsi qazandırmağı hədəfləyir.

“QuantumScape” şirkətinin “Eagle Line” adlı pilot istehsal müəssisəsində hazırlanan nümunələr artıq avtomobil istehsalçılarının sınaq proqramlarında mühüm yer tutur. Şirkət daha əvvəl “Volkswagen” qrupu ilə də oxşar əməkdaşlığa imza atmışdı və hazırladığı “QSE-5” modeli ilə texnologiyasının potensialını nümayiş etdirmişdi.

“Honda” tərəfdə isə vəziyyət bir qədər fərqli inkişaf edir. Yapon istehsalçı Şimali Amerikadakı bəzi elektrikli avtomobil layihələrini müvəqqəti dayandıraraq daha ehtiyatlı inkişaf strategiyası seçib.

Şirkət 2030-cu il üçün müəyyən etdiyi satış hədəflərinə yenidən baxıb və 2027-ci ildən etibarən hibrid modellərə daha çox diqqət ayırmağı planlaşdırır. “QuantumScape” ilə tərəfdaşlıq isə “Honda” üçün tam elektrikli avtomobillərə keçid prosesində texnologiyanın daha da təkmilləşməsini gözləyərkən strateji üstünlük əldə etməyə imkan verir.

Şirkət batareya sahəsindəki tədqiqat və inkişaf fəaliyyətlərini hibrid avtomobil çeşidi ilə paralel şəkildə davam etdirərək uzunmüddətli məqsədlərinə hazırlaşır.

Samir