Narsistik xüsusiyyətlərə malik kişilərlə münasibətlər ilk baxışdan ideal görünə bilər. Lakin zaman keçdikcə sevgi adı altında psixoloji təzyiq, emosional manipulyasiya və maliyyə nəzarəti özünü göstərə bilər. Psixoloqlar belə münasibətlərdə diqqətdən kənarda qalmamalı olan bir sıra davranışlara diqqət çəkirlər.

HİT.az xəbər verir ki, bu barədə Ukraynanın UNIAN nəşri “Your Tango”ya istinadən yazıb.

Məqalədə qeyd olunur ki, manipulyativ davranışların bir çoxunu münasibətlərin ilkin mərhələsində də müşahidə etmək mümkündür.

1. Qəsdən soyuq davranmaq

Narsistik xüsusiyyətlərə malik kişi sevgisini mükafat və cəza vasitəsinə çevirə bilər. Qadın onun istəklərinə uyğun davrandıqda diqqət və qayğı göstərir, etiraz etdikdə isə qəfil uzaqlaşır. Belə münasibətlərdə romantik davranışlar qəzəb, təhqir və alçaltma ilə əvəzlənə bilər.

2. Psixoloji manipulyasiya

Belə kişilər qadının öz hisslərinə və gördüklərinə şübhə etməsinə çalışırlar. Hadisələri təhrif etmək, deyilənləri inkar etmək və qarşı tərəfi hər şeyi yanlış anlamaqda günahlandırmaq bu davranışın əsas formalarındandır. Nəticədə qadın zamanla öz mühakimələrinə və yaddaşına etibarını itirə bilər.

3. Öz səhvlərini qadının üzərinə atmaq

Manipulyator kişi özündə olan mənfi xüsusiyyətləri və davranışları partnyoruna aid edə bilər. Məsələn, özü xəyanət etdiyi halda həyat yoldaşını sədaqətsizlikdə ittiham edə, öz qısqanclığını onun üzərinə yıxa bilər. Ailə terapevti Darlene Lancer bunu insanın özündə qəbul etmək istəmədiyi xüsusiyyətləri başqasına aid etməsi ilə izah edir.

4. Qadını dostlarından və yaxınlarından uzaqlaşdırmaq

Nəzarəti gücləndirmək istəyən kişi qadının dostları və qohumları ilə münasibətlərini məhdudlaşdıra bilər. Rəfiqələrlə görüşlərə görə mübahisə yaratmaq, ailə üzvləri ilə əlaqələri kəsməyə məcbur etmək bu davranışın nümunələridir. Beləliklə, qadın tədricən sosial çevrəsindən təcrid oluna bilər.

5. Münasibətləri rəqabətə çevirmək

Sağlam tərəfdaşlıq əvəzinə daimi üstünlük mübarizəsi yaratmaq da təhlükəli əlamətlərdəndir. Belə kişi həyat yoldaşının uğurlarını kiçildə, nailiyyətlərini özünə qarşı təhdid kimi qəbul edə bilər. Psixoloq Ramani Durvasula narsistik xüsusiyyətlər arasında empatiya çatışmazlığını, özünü üstün görməyi və daim başqalarının heyranlığını qazanmaq istəyini qeyd edir.

6. Onunla münasibətdə olduğuna görə qadından minnətdarlıq gözləmək

Belə kişilər özlərini münasibətin əsas və əvəzolunmaz tərəfi hesab edə bilərlər. Qadının onunla birlikdə olduğuna görə daim minnətdarlıq göstərməli olduğunu düşünür, özünü partnyorundan üstün tutur.

7. Həyatına və seçimlərinə nəzarət etmək

Qadının necə geyinməsi, kimlə görüşməsi və boş vaxtını necə keçirməsi ilə bağlı qərarları özü verməyə çalışan kişi nəzarətçi davranış nümayiş etdirir. Müstəqilliyini qorumaq istəyən qadına isə təzyiq göstərə, onu günahkarlıq hissi ilə idarə etməyə çalışa bilər.

8. Qadının hisslərini əhəmiyyətsiz saymaq

Partnyorunun narahatlığını dinləməmək, hisslərini lağa qoymaq və yaşadıqlarını kiçiltmək də manipulyativ davranışlar sırasındadır. Ekspert Meredit Dizlinin fikrincə, narsistik xüsusiyyətləri güclü olan insanlar başqalarına vurduqları emosional zərəri hər zaman dərk etmirlər. Bunun səbəblərindən biri empatiya qabiliyyətinin zəif olmasıdır.

9. Ailə maliyyəsinə nəzarət etmək

Maliyyə asılılığı qadını münasibətdə saxlamaq üçün istifadə edilən vasitələrdən birinə çevrilə bilər. Kişi ortaq pula çıxışı məhdudlaşdıra, bütün xərclərə nəzarət edə və ya ailənin maliyyə resurslarını öz ixtiyarına götürə bilər. Nəticədə qadının müstəqil yaşamaq imkanları zəifləyir.

10. Qadının özünəinamını məqsədli şəkildə sarsıtmaq

Manipulyatorun ən təhlükəli davranışlarından biri qadını öz dəyərinə inamdan məhrum etməkdir. O, partnyoruna heç kim tərəfindən sevilməyəcəyini, onsuz həyatını qura bilməyəcəyini təlqin edə bilər. Psixoloq Ramani Durvasulanın fikrincə, belə münasibətlərdə qadın daim kişinin tələblərinə cavab verməyə çalışır, lakin nə etsə də, onun gözündə kifayət qədər yaxşı ola bilmir.

Samir