"Honda" uzun illər etibarlı mühərrikləri ilə tanınsa da, Avropada 10-cu nəsil "Honda Civic" modellərində quraşdırılan 1,0 litrlik üçsilindrli mühərriklə bağlı gözlənilməz problemlərlə üzləşib.
HİT.az xəbər verir ki, bu barədə "Libertatea" nəşri yazıb.
Bir litrlik mühərrikin problemləri
Bu mühərrikin əsas xüsusiyyətlərindən biri yağın içərisində işləyən zamanlama kəmərinin olmasıdır. Bu texniki həll "Ford" və "Stellantis" şirkətlərinin istifadə etdiyi sistemə bənzəyir.
Nəşrdə qeyd olunur ki, "Honda" zamanlama kəmərinin dəyişdirilməsi üçün konkret interval müəyyən etdiyindən ağır nasazlıqların riski xeyli azalıb. Bununla belə, istehsalçının tövsiyə etdiyi keyfiyyətli mühərrik yağı istifadə edilmədikdə kəmər zamanla daha tez aşınır.
Mühərrikin digər zəif cəhətlərindən biri aşağı dövrlərdə qeyri-sabit işləməsidir. Bu problem bəzən mühərrikin fasilələrlə işləməsi ilə müşayiət olunur. Səbəblər alışdırma şamlarının və ya forsunkaların nasazlığından tutmuş silindr başlığı contasında yaranan qüsurlara qədər dəyişə bilər.
Konkret hadisə: 2018-ci il buraxılışlı "Honda Civic", cəmi 56 min kilometr yürüş
Rumıniyanın "Coasta de Est" servis mərkəzinə 2018-ci il istehsalı, cəmi 56 min kilometr yürüşü olan "Honda Civic" avtomobili mühərrikin çətin işə düşməsi və qeyri-sabit işləməsi səbəbindən gətirilib.
İlkin mərhələdə mexaniklər ABS sensorunun nasazlığından şübhələniblər. Bu problem aradan qaldırıldıqdan sonra diqqət mühərrikə yönəlib. Alışdırma şamları və forsunkalar dəyişdirilsə də, nasazlıq aradan qalxmayıb. Halbuki forsunkaların dəyişdirilməsi kifayət qədər bahalı prosedurdur.
Daha sonra yanacaq nasosu da yoxlanılıb. Çünki həmin hissə ilə bağlı geri çağırma kampaniyası mövcud idi. Lakin bu ehtimal da təsdiqini tapmayıb.
Yalnız endoskop vasitəsilə aparılan vizual baxış zamanı üçüncü silindrdə maye izləri aşkarlanıb. Bu isə silindr başlığı contasındakı nasazlıq səbəbindən antifrizin sızdığını göstərib.
Mürəkkəb təmir prosesi
Təmir zamanı silindr başlığına çatmaq üçün bir sıra aqreqatlar sökülüb. Yoxlama zamanı paylayıcı valların yaxşı vəziyyətdə olduğu müəyyən edilib ki, bu da yağın vaxtında dəyişdirildiyini göstərib. Turbinin giriş hissəsində çöküntülər olsa da, onun dəyişdirilməsinə ehtiyac yaranmayıb. Silindr başlığı da icazə verilən texniki hədlər daxilində olduğundan bərpa işlərinə ehtiyac olmayıb.
Bununla yanaşı, mexaniklər əvvəlki təmir zamanı buraxılmış səhvləri də aşkarlayıblar. Məlum olub ki, zamanlama mexanizminin əvvəlki dəyişdirilməsi zamanı ustalardan biri uyğun conta əvəzinə silikon istifadə edib. Bu isə yağlama kanallarının qismən tutulmasına və yağ dövriyyəsinin pozulmasına səbəb olub. Bundan əlavə, zamanlama kəmərinin dişlisi dəyişdirilmədiyi üçün kəmərin aşınması sürətlənib.
Silindr başlığı söküldükdən sonra əsas nasazlıq tam aydınlaşıb. İkinci və üçüncü porşenlər arasındakı conta yanaraq nazikləşib və nəticədə antifriz sızması baş verib.
Qüsurlu conta yenisi ilə əvəz edilib. Servis əməkdaşıları "Honda"nın rəsmi servis mərkəzinin mütəxəssisləri ilə məsləhətləşdikdən sonra məlum olub ki, bu problem tez-tez keyfiyyətsiz və həddindən artıq nazik contalardan qaynaqlanır.
"Honda"nın etibarlılığı azalır?
Nəşrin qənaətinə görə, "Honda" mühərrikləri hələ də sənayenin ən etibarlı mühərrikləri sırasında yer alsa da, son nəsil 1,0 və 1,5 litrlik aqreqatlarda, xüsusilə silindr başlığı contası ilə bağlı nasazlıqların daha tez-tez qeydə alınması diqqət çəkir.
Samir
