Rusiya yaxın günlərdə Ukraynaya daha bir kütləvi hücum həyata keçirə bilər. 

HİT.az xəbər verir ki, bu barədə aviasiya eksperti Boqdan Dolintse “Apostrof”un efirində bildirib.

Ekspertin sözlərinə görə, bu dəfə Rusiya təxminən 10 gün ərzində silah toplayıb. Buna görə də düşmənin yeni genişmiqyaslı zərbə hazırlamaq imkanları mövcuddur.

“Görürük ki, düşmən faktiki olaraq 10 gün ərzində bu hücum üçün hazırlıq aparıb və silah toplayıb. Nəzərə alsaq ki, istifadə edilən vasitələrin sayı Rusiyanın bu müddət ərzində istehsal edə biləcəyi miqdardan az olub, kifayət qədər qısa müddətdən sonra, yəni artıq yaxın günlərdə daha bir kütləvi hücuma cəhdin təkrarlanması istisna edilmir”, – Dolintse deyib.

Ekspertdən həmçinin Rusiya tərəfindən Ukraynaya atılan ballistik raketlərin sayına düşmənin müvafiq buraxılış qurğularının Müdafiə Qüvvələri tərəfindən vurulmasının təsir edib-etmədiyi soruşulub.

Ekspertin fikrincə, düşmən artıq Ukrayna kəşfiyyatının necə işlədiyini, peyklərin fəaliyyət prinsipini və digər məsələləri yaxşı anlayır. O bildirib ki, rusiyalılar buraxılış qurğularının daha gizli şəkildə hərəkət etdirilməsinə imkan verən “peyklərdən yan keçən” marşrutları dəyişirlər.

“İkincisi, buraxılış qurğularının vurulmasından danışsaq, son dövrdə bu qurğuların məhv edilməsi və ya zədələnməsi ilə bağlı yalnız bir neçə hal barədə məlumat görmüşük. Bu, imkanların azaldılması baxımından əhəmiyyətli təsir göstərmir, çünki Rusiyanın bu sistemlərdən kifayət qədər çox sayda var”, deyə Dolintse qeyd edib.

O izah edib ki, vəziyyətə ciddi təsir göstərmək üçün Rusiya ordusunun onlarla buraxılış qurğusunun qısa müddət ərzində məhv edilməsi lazımdır.

Samir