Avropa ölkələrində gündəlik davranış qaydaları bir-birindən fərqlənir. İlk baxışdan adi görünən yanaqdan öpmək, evə ayaqqabı ilə daxil olmaq və görüşə vaxtından əvvəl gəlmək kimi jestlər bəzi ölkələrdə narahatlıq yarada bilər.

HİT.az xəbər verir ki, “Euronews” nəşrinin məlumatına görə, dil öyrənmə platforması “Preply” 27 Avropa ölkəsində 1600 nəfər arasında sorğu keçirərək turistlərin bilməli olduğu etik davranış qaydalarını araşdırıb.

Nəticələr göstərib ki, Avropada yanaqdan öpərək salamlaşmaq düşünüldüyü qədər geniş yayılmayıb. 27 ölkədən 23-də respondentlərin əksəriyyəti belə salamlaşmanı yalnız qarşı tərəf təşəbbüs göstərdikdə qəbul edəcəklərini bildiriblər. Ümumilikdə sorğuda iştirak edənlərin 85 faizi bu mövqedədir. Danimarka, Estoniya, İsveç və Sloveniyada isə iştirakçılar yanaqdan öpərək salamlaşmaqdan imtina edəcəklərini deyiblər.

Qonaq gedərkən ayaqqabıları çıxarmaq lazımdırmı?

Araşdırmaya əsasən, 27 ölkədən 24-də insanların əksəriyyəti kiminsə evinə qonaq gedərkən ayaqqabılarını çıxarır. Bu qaydaya xüsusilə Şimali Avropa ölkələrində ciddi yanaşılır. İsveçdə sorğu iştirakçılarının hamısı evə daxil olarkən ayaqqabıların çıxarılmasını vacib hesab edib.

İspaniya, İtaliya və Portuqaliyada isə əksinə, evdə ayaqqabı ilə gəzməyə üstünlük verilir. Yaş fərqi də bu məsələdə özünü göstərib: 18-34 yaş arası respondentlərin əksəriyyəti ayaqqabılarını həmişə çıxardıqlarını, 35-54 yaş qrupunda olanlar isə ev sahibinin bunu xahiş etməsini gözlədiklərini bildiriblər.

Qonaq gedərkən hədiyyə aparmaq ənənəsi

Sorğuda iştirak edənlərin yarıdan çoxu qonaq gedərkən ev sahibinə hədiyyə aparmağı adi davranış hesab edir. Təxminən üçdə biri isə bunu yalnız xüsusi günlərdə etdiyini bildirib. Finlandiya bu baxımdan fərqlənib: respondentlərin əksəriyyəti qonaq gedərkən heç vaxt hədiyyə aparmadıqlarını deyiblər.

27 ölkədən 17-də insanlar qonaq gedərkən ən çox şərab və ya gül aparmağa üstünlük verirlər. Lakin Avstriya, Böyük Britaniya və İspaniya da daxil olmaqla doqquz ölkədə bu jestin əsasən xüsusi günlərdə uyğun hesab edildiyi məlum olub.

Süfrə mədəniyyəti və dəqiqlik

Araşdırmanın maraqlı nəticələrindən biri də yeməyi boşqaba qoyulduğu qədər yeməklə bağlıdır. Bütün 27 ölkədə yeməyi sona qədər bitirmək ev sahibinə hörmət əlaməti kimi qəbul edilir. Sorğuda iştirak edən kişilərin 82 faizi, qadınların isə 75 faizi yeməklərini həmişə bitirdiklərini bildirib.

Görüşlərə vaxtında gəlmək məsələsində isə vahid yanaşma yoxdur. 27 ölkədən 23-də respondentlərin əksəriyyəti təyin olunmuş saatda gəlməyə üstünlük verir. Yunanıstanda punktuallığa xüsusi əhəmiyyət verilir. Çexiya, Almaniya, Polşa və Fransada isə görüşə bir qədər tez gəlməyi seçənlərin sayı daha çoxdur.

Sorğuda kişilərin 35 faizi görüşə əvvəlcədən gəlməyə üstünlük verdiyini bildirib. Qadınlar arasında isə dəqiq vaxtında gəlmək mövqeyi daha çox yayılıb. Araşdırma həmçinin göstərib ki, subay insanlar gecikməyə iki dəfə daha çox meyillidir. Uşaqlı ailələr üçün isə müəyyən edilmiş vaxta əməl etmək daha çətin olur.

Mütəxəssislər səyahət zamanı yerli adət-ənənələri və davranış normalarını əvvəlcədən öyrənməyi tövsiyə edirlər. Bu, turistlərin xoşagəlməz vəziyyətlərlə üzləşməsinin qarşısını almaqla yanaşı, yerli sakinlərə hörmət göstərməsinə də kömək edir.

Samir