Astrologiya inanclarına görə, insanın həftənin hansı günü dünyaya gəlməsi onun xarakteri, həyat sınaqları və mənəvi inkişaf yolu ilə əlaqələndirilir. Hər günün müəyyən planetin təsiri altında olduğu və həmin planetin insanın həyat dərslərinə istiqamət verdiyi iddia edilir.

HİT.az xəbər verir ki, “Parade” nəşri astroloji yanaşmaya əsaslanaraq həftənin hər günündə doğulan insanların hansı xüsusiyyətlərə və həyat dərslərinə malik olduğu barədə yazı dərc edib.

Bazar günü doğulanlar – özünəinamı öyrənməlidir

Astrologiyada bazar günü Günəşin təsiri altında hesab olunur. Günəş həyat enerjisi və özünüifadənin rəmzidir. Bu gündə doğulan insanların əsas həyat dərsinin öz qabiliyyətlərinə inanmaq, diqqət mərkəzində olmaqdan çəkinməmək olduğu bildirilir. Onlara yaradıcılıq imkanlarını nümayiş etdirmək və risk etmək tövsiyə olunur.

Bazar ertəsi doğulanlar – öz qayğılarına qalmalıdır

Bazar ertəsi Ayla əlaqələndirilir. Ay emosiyaları, intuisiyanı və qayğını simvolizə edir. Bu gündə doğulanların başqalarının hisslərinə həssas yanaşdığı, yaxınlarının problemlərini dinləməyi bacardığı düşünülür. Lakin astroloqlar onların öz ehtiyaclarını da unutmamalı, başqalarına göstərdikləri diqqəti özlərinə də ayırmalı olduqlarını vurğulayırlar.

Çərşənbə axşamı doğulanlar – emosiyalarını idarə etməlidir

Bu gün Marsın təsiri ilə əlaqələndirilir. Mars enerji, cəsarət və mübarizənin rəmzidir. Belə insanların qətiyyətli, liderliyə meyilli və öz mövqeyini müdafiə etməyə hazır olduqları iddia edilir. Onların əsas sınağı isə qəzəbi nəzarətdə saxlamaq, enerjilərini düzgün istiqamətləndirmək və əhəmiyyətsiz məsələlərə görə güc sərf etməməkdir.

Çərşənbə doğulanlar – həqiqəti söyləməyi öyrənməlidir

Çərşənbə Merkuri planeti ilə əlaqələndirilir. Bu planet ünsiyyət, intellekt və məlumatı təmsil edir. Həmin gün doğulanların danışıq və fikir ifadə etmək qabiliyyətinin güclü olduğu düşünülür. Bununla belə, astroloji şərhlərə görə, onlar münaqişədən yayınmaq üçün həqiqi fikirlərini gizlətməməli, öz biliklərinə daha çox güvənməlidirlər.

Cümə axşamı doğulanlar – həyatın axarına güvənməlidir

Cümə axşamı Yupiterin təsiri altında hesab olunur. Yupiter inkişaf, müdriklik və uğurla əlaqələndirilir. Bu gündə doğulanlara nikbinlik, səxavət və yeni imkanları görmək bacarığı aid edilir. Onların əsas həyat dərsi isə daha çox şey əldə etmək istəyini həddindən artıq irəli aparmamaq, sahib olduqlarına görə minnətdar olmağı bacarmaqdır.

Cümə doğulanlar – öz dəyərini anlamalıdır

Cümə günü Venera ilə əlaqələndirilir. Venera sevgi, gözəllik və şəxsi dəyərlərin simvoludur. Bu gündə doğulanların münasibətlərdə sevgi və qayğı göstərməyə meyilli olduğu bildirilir. Lakin onların başqalarından sevgi və diqqət qəbul etməkdə çətinlik çəkə biləcəyi də qeyd olunur. Astroloqlar belə insanlara öz dəyərlərini anlamağı və qarşılıqlı münasibətlər qurmağı tövsiyə edirlər.

Şənbə doğulanlar – səbir və məsuliyyət dərsi alır

Şənbə Saturnun təsiri ilə əlaqələndirilir. Saturn zaman, intizam, məsuliyyət və karma ilə bağlıdır. Bu gündə doğulan insanların erkən yaşlardan ciddi məsuliyyət daşımağa meyilli olduğu iddia edilir. Onların əsas həyat dərsləri səbirli olmaq, ardıcıllıq nümayiş etdirmək və zəhmətləri ilə özünəinam qazanmaqdır. Eyni zamanda, istirahətin zəiflik deyil, həyatın vacib hissəsi olduğunu anlamaları tövsiyə edilir.

Samir