Son illər Azərbaycanda kişilər arasında impotensiya halları artır. Həkimlərin bildirdiyinə görə, təkcə nisbətən yaşlı insanlarda deyil, orta nəslin nümayənədələrində də belə problemlərə rast gəlinir. Araşdırmalara əsasən, 35-40 yaşına çatmış kişilərin təxminən 40%-i cinsi zəifliyin müxtəlif formalarından əziyyət çəkir. Cinsi fəaliyyətin tam itməsi hallarına 50 yaşlı kişilərin 20%-də, 70 yaşlı kişilərin isə 50%-də rast gəlinir.  

İmpotensiyanı yaradan səbəblər nələrdir? 

Bu barədə Modern.az-a danışan seksoloq Tahmasib Cavadzadə əvvəlcə xatırladıb ki, impotensiya iki cür olur. Birincisi fizioloji impotensiya, ikincisi isə psixoloji impotensiyadır:

"Biz psixoloji impotensiyanı erektil disfunksiya adlandırırıq. Fizioloji impotensiyaya qocalıq və ya digər fizioloji hallar səbəb ola bilər. Məsələn, xəstəliklər, diabet və ya cinsi orqanın zədə alması, testosteron çatışmazlıgı və hormonal balansın pozulmasını buna səbəb göstərmək olar". 

Onun sözlərinə görə, erektil disfunksiya, yəni psixoloji impotensiyanın səbəbləri müxtəlifdir:

"Burada səbəblər çoxdur və fiziki impotensiyadan fərqli olaraq psixi impotensiyanı biz seksoloqlar müalicə edirik. Psixoloji impotensiyada pasient hər hansı bir analiz verdikdə onda vəziyyətin normal oldugunu görürük. Ancaq hər şey normal olsa da, cinsi əlaqə zamanı problemlər yaşanır. Psixoloji impotensiya budur ki, kişi adi halda və ya səhərlər əl ilə mastrubasiya etdikdə cinsi orqan sərtləşir, ancaq real seksdə sərtləşmir. Bunun səbəbləri aşağıdakılar ola bilər:

Həddən artıq mastrubasiya etmək,
Qeyri-adi seks fantaziyaları,
Həddən artıq porno filmə baxmaq,
Həddən artıq cinsi əlaqədə olmaq,
Partnyorun insan üçün adiləşməsi".

Seksoloqun fikrincə, qadınların açıq və cazibədar formada geyinməsi də cinsi zəifliyə səbəb ola bilər:

"Ancaq onu qeyd etmək lazımdır ki, çox vaxt qadının açıq geyinməsini adiləşdirmək seks cəhətdən problem yaratmır. Çünki müəyyən hallarda və müəyyən yerlərdə insan açıq geyinməyə alışır. Məsələn, dənizdə, hovuzda və ya idman zalında, bu cür geyim normal qarşılanır. Bu adiləşməsəydi, o zaman belə yerlərdə biz ciddi problemlərlə üzləşərdik. Amma əsas problem odur ki, bu zaman ehtiraslandırıcı hallar azalır".

T.Cavadzadə onu da qeyd edib ki, qadınlar tamamilə bağlı geyimdə olsa, kişilərdə erektil disfunksiya olmayacaq demək deyil:

"Əgər xanımlar hamısı açıq geyinməsələr və ya İslami geyimə riayət edib, hicablı olsalar, yenə də, kişilərdə erektil disfunksiya olacaq. Statistika göstərir ki, qapalı geyimlər olan ölkələrdə də erektil disfunksiya göstəricisi yüksəkdir. Bəzən qadının açıq geyinməsi ciddi erektil disfunksiyaya səbəb olmur. Amma ailədə açıq geyinmək problem yaradır. Məsələn, arvad ərinin yanında açıq geyinib gəzirsə, o zaman bir-birilərinə qarşı ehtiraslanma halları azalır".