Öd kisəsi daşları çox vaxt simptom vermədən inkişaf edə bilir, lakin diqqətsiz qaldıqda ciddi sağlamlıq problemlərinə səbəb ola bilər. Müalicə olunmayan hallarda risklərin əhəmiyyətli dərəcədə artdığı və bəzi vəziyyətlərdə xərçənglə əlaqələndirilə bildiyi bildirilir. Erkən diaqnoz və düzgün müalicə mümkün fəsadların qarşısının alınmasında həlledici rol oynayır.

HİT.az xəbər verir ki, öd daşları xüsusilə 40 yaşdan yuxarı qadınlarda daha çox rast gəlinir və uzun müddət gizli şəkildə inkişaf edə bilir. Daha irəliləmiş mərhələlərdə şiddətli qarın ağrısı, bel və çiyin nahiyəsinə yayılan narahatlıqla özünü göstərə bilər.

Mütəxəssislər gecikmiş müalicənin infeksiya, öd yollarının tıxanması və daha ciddi ağırlaşmalara səbəb ola biləcəyi barədə xəbərdarlıq edirlər.

Op. Dr. Nazlı Yavuzer Türe qeyd edir ki, xüsusilə risk qrupuna daxil olan şəxslərdə bu vəziyyətin vaxtında aşkarlanması vacibdir. Onun sözlərinə görə, daşlar uzun müddət heç bir əlamət verməyə bilər.

Lakin proses irəlilədikcə qarın, bel və çiyinə yayılan kəskin ağrılar ortaya çıxır. Bu ağrılar bəzən ürək tutması ilə də qarışdırıla bilir. Müalicə gecikdirildikdə infeksiya, tıxanma, sarılıq və pankreatit kimi ağır fəsadlar yarana bilər.

Araşdırmalara görə, müalicə olunmayan öd daşı olan şəxslərdə öd kisəsi xərçəngi riski sağlam insanlarla müqayisədə təxminən 5–7 dəfə daha yüksək ola bilər. Daşın 3 sm-dən böyük olması bu riski daha da artırır.

Risk faktorları arasında artıq çəki, hormonal dəyişikliklər və xüsusilə qadınlarda doğuş dövrü öndə gəlir. 

Qidalanma ilə bağlı isə mütəxəssislər kiçik, tez-tez yemək, kifayət qədər lif qəbulu, sağlam yağlar, bol su içilməsi və çəki nəzarətini tövsiyə edirlər.

Müalicədə ən geniş yayılmış üsul laparoskopik (qapalı) əməliyyatdır. Adətən 30 dəqiqədən az çəkir və pasiyentlərin çoxu ertəsi gün evə buraxılır.

Əməliyyatdan sonra ilk 2–3 ay ərzində qidalanmaya diqqət etmək, yağlı qidaları tədricən artırmaq və orqanizmin reaksiyasını izləmək tövsiyə olunur.

Samir