Yüksək intellekt insanın həyatda uğur qazanacağına zəmanət vermir. Bəzən orta səviyyəli düşünmə qabiliyyətinə malik insanlar müəyyən xarakter xüsusiyyətləri və vərdişləri sayəsində daha böyük nailiyyətlər əldə edirlər. Mütəxəssislərin diqqət çəkdiyi beş keyfiyyət isə qanunauyğunluqları görmək, özünü tanımaq, nikbinlik, uğursuzluqları geridə qoymaq və daim öyrənməyə maraq göstərməkdir.

HİT.az xəbər verir ki, bu barədə “YourTango” nəşrində dərc olunan materialda bəhs edilir.

Məqalədə vurğulanır ki, yüksək IQ insana müəyyən üstünlüklər qazandıra bilər, lakin bu, uğurun əsas şərti deyil. Əsas məsələ insanın malik olduğu imkanlardan necə istifadə etməsi, çətinliklər qarşısında hansı mövqe tutması və öz üzərində nə qədər işləməsidir.

1. Qanunauyğunluqları və əlaqələri görmək

Uğurlu insanların əsas xüsusiyyətlərindən biri müxtəlif hadisələr arasında əlaqə qurmaq və təkrarlanan davranış modellərini müəyyənləşdirmək bacarığıdır.

Bu, insanın həm ətrafında baş verənləri, həm də öz davranışlarını düzgün təhlil etməsinə kömək edir. Məsələn, dərslərdə geri qalmağın səbəbinin gec yatmaq olduğunu anlayan şəxs gündəlik rejimini dəyişə bilər. Rəhbərinin həftəlik görüşləri unutduğunu görən əməkdaş isə ona əvvəlcədən xatırlatma göndərməklə işini daha yaxşı təşkil edə bilər.

2. Özünü tanımaq və davranışlarını qiymətləndirmək

Özünü tanımaq insanın güclü və zəif tərəflərini, emosiyalarını və davranışlarının nəticələrini dərk etməsidir.

Məsələn, hər gün işə gecikən bir şəxs səbəbi daim tıxaclarda və ya digər xarici amillərdə axtara bilər. Öz davranışını obyektiv qiymətləndirən insan isə problemin qarşısını almaq üçün evdən daha tez çıxmağın vacibliyini anlayar.

Məqalədə qeyd olunur ki, özünü tanımaq yalnız şəxsi inkişaf üçün deyil, münasibətlər baxımından da əhəmiyyətlidir. İnsan öz emosiyalarını və davranışlarını anladıqca başqalarını da daha yaxşı başa düşür. Bu keyfiyyət işəgötürənlər üçün də vacib hesab olunur.

3. Həddindən artıq nikbinlik

Uğur qazanan insanları fərqləndirən digər xüsusiyyətlərdən biri öz imkanlarına inanmaq və çətinliklərə baxmayaraq irəli getməkdir.

İnsan əvvəlcədən uğursuz olacağına əmin olarsa, çox vaxt heç cəhd etməyəcək. Əksinə, özünə inanan şəxs ən yaxşı namizəd olmasa belə, arzuladığı işə müraciət edir və şansını sınayır.

Məqalədə vurğulanır ki, bəzən uğura aparan əsas amil ən ağıllı və ya ən istedadlı olmaq deyil, sadəcə addım atmaqdan çəkinməməkdir.

4. Uğursuzluqları geridə qoymaq bacarığı

Uğurlu insanlar hər şeyi nəzarətdə saxlamağa çalışmır və dəyişdirə bilmədikləri amillərə həddindən artıq enerji sərf etmirlər.

Onlar rədd cavablarından və uğursuz cəhdlərdən sonra daha tez toparlanır, diqqətlərini nəticə verə biləcək işlərə yönəldirlər. Başqalarının qərarlarını və nəzarətlərindən kənar hadisələri dəyişdirməyə çalışmaq əvəzinə, öz imkanlarından səmərəli istifadə etməyə üstünlük verirlər.

Bu yanaşma insanın həm emosional gücünü qorumasına, həm də qarşısına çıxan yeni fürsətləri dəyərləndirməsinə şərait yaradır.

5. Daim öyrənməyə maraq göstərmək

Məqalədə uğurun əsas amillərindən biri kimi göstərilən sonuncu xüsusiyyət daim öyrənmək və dünyanı kəşf etmək istəyidir.

Maraq göstərən insanlar yeni biliklər əldə etməyə, fərqli təcrübələr qazanmağa və bacarıqlarını inkişaf etdirməyə daha çox meyilli olurlar. Materialda qeyd edilir ki, araşdırmalar da maraqlı və öyrənməyə açıq insanların təhsil və iş həyatında müəyyən üstünlüklərə malik olduğunu göstərir.

İnsan nə qədər çox öyrənirsə, yeni imkanları görmək və dəyişən şəraitə uyğunlaşmaq ehtimalı da bir o qədər artır.

Məqalənin əsas qənaəti budur ki, yüksək intellekt uğur üçün vacib amillərdən biri olsa da, təkbaşına kifayət etmir. Davamlı inkişaf, özünü tanımaq, nikbinlik və hərəkətə keçmək bacarığı insanın imkanlarını daha yaxşı reallaşdırmasına kömək edə bilər.

Samir