Mütəxəssislərin fikrincə, pendir alkoqolun mədə-bağırsaq traktında sorulmasını qismən yavaşlada və etanolun parçalanması zamanı yaranan toksik maddələrin qaraciyərə təsirini azalda bilər. 

HİT.az xəbər verir ki, bu barədə İspaniyanın Mursiya şəhərində yerləşən Virgen de la Arrixaca universitet xəstəxanasının təcili yardım və ailə həkimi Sara Marin Berbell “El Confidencial” nəşrinə bildirib.

Həkimin sözlərinə görə, spirtli içki qəbulundan əvvəl az miqdarda pendir yemək faydalı ola bilər.

“Heyvanlar üzərində aparılan araşdırmalar göstərib ki, spirt qəbulundan əvvəl pendir verilən siçovullarda qanda etanol və asetaldehid səviyyəsi daha aşağı olub. Asetaldehid alkoqolun parçalanmasının əsas toksik məhsullarından biridir və asma (sərxoşluq sonrası hal) simptomları ilə əlaqələndirilir”, deyə ekspert bildirib.

Mütəxəssis qeyd edib ki, pendir həzm sistemində alkoqolun sorulmasını qismən yavaşladaraq qoruyucu baryer rolunu oynaya bilər. Bundan əlavə, tərkibində olan kalsium və B qrupu vitaminləri sinir sistemi, beyin və əzələlərin normal fəaliyyəti üçün vacibdir.

Həkim həmçinin bildirib ki, bəzi araşdırmalar pendir istehlakının iltihabi prosesləri azalda və qaraciyər zədələnməsi riskini aşağı sala biləcəyini göstərir, lakin bu nəticələr əlavə elmi tədqiqatlara ehtiyac duyur.

Bununla yanaşı, mütəxəssis vurğulayıb ki, heç bir məhsul alkoqolun həddindən artıq istifadəsinin fəsadlarını tam şəkildə aradan qaldıra bilməz. Asmadan qorunmağın ən effektiv yolu isə spirtli içkilərin ölçülü qəbulu və kifayət qədər su içməkdir.

Samir