Müasir QWERTY klaviaturalı smartfonları artıq sadəcə nostalji cihazlar adlandırmaq olmaz. Bu modellər aktual Android versiyaları, uzunmüddətli dəstək, keyfiyyətli ekranlar və hətta süni intellekt funksiyaları təklif edir.
HİT.az xəbər verir ki, sensor ekranların tam üstünlüyünə baxmayaraq, QWERTY klaviaturalı smartfonlar gözlənilmədən yenidən bazara qayıdır.
Əvvəllər belə cihazlar yalnız "BlackBerry" ilə əlaqələndirilirdisə, indi bir neçə şirkət çox yazı yazan və düymələrin toxunuş hissini qiymətləndirən istifadəçilər üçün müasir Android smartfonları təqdim edir.
“BGR” ekspertləri 2026-cı ildə almaq mümkün olan fiziki klaviaturalı ən yaxşı dörd Android smartfonun siyahısını hazırlayıb.
Unihertz Titan 2 Elite
Cihazın əsas xüsusiyyəti fiziki QWERTY klaviaturasıdır. İcmalçılar onu əla toxunuş hissinə görə bazardakı ən yaxşı klaviaturalardan biri hesab edirlər.
Demək olar ki, hər bir düyməni istənilən tətbiqi və ya funksiyanı işə salmaq üçün proqramlaşdırmaq mümkündür.
Bundan əlavə, klaviatura sensor idarəetməni dəstəkləyir. İstifadəçi düymələrin üzərində barmağını hərəkət etdirərək onları səhifələri sürüşdürmək və kursoru idarə etmək üçün toxunma paneli kimi istifadə edə bilər.
Daxili işıqlandırma isə qaranlıq şəraitdə rahat yazmağa imkan verir.
Digər texniki göstəricilərə gəlincə, smartfon 120 Hz yenilənmə tezliyinə malik 4,03 düymlük AMOLED ekranla təchiz olunub.
Kamera sistemi 50 meqapiksellik əsas kamera, 20 dəfə yaxınlaşdırma imkanlı 50 meqapiksellik kamera və 32 meqapiksellik selfi kamerasından ibarətdir.
Rəylərə görə, kameralar flaqman modellərin səviyyəsinə çatmasa da, keyfiyyətli şəkillər çəkməyə imkan verir. Kompakt korpusa baxmayaraq, batareya aktiv istifadədə bir gün ərzində kifayət edir.
Clicks Communicator
"iPhone" üçün klaviaturalı örtükləri ilə tanınan "Clicks" şirkəti fiziki klaviaturalı ilk smartfonunu təqdim edib.
"Unihertz Titan 2 Elite" kimi bu model də 4,03 düymlük OLED ekranla təchiz olunub. Daxili yaddaş həcmi 256 GB-dır və microSD kart vasitəsilə artırıla bilər.
Cihazın qeyri-adi funksiyalarından biri fərdiləşdirilə bilən bildiriş işıqlandırmasıdır. Müxtəlif tətbiqlər üçün fərqli işıq rəngləri seçmək mümkündür.
Smartfon həmçinin 4000 mAh batareyaya, dəyişdirilə bilən arxa panellərə və 3,5 mm qulaqlıq girişinə malikdir.
Minimal Phone
Bu model əyləncə məzmununa çıxışı minimuma endirmək istəyən istifadəçilər üçün nəzərdə tutulub.
Əsas xüsusiyyəti elektron kitab ekranlarına bənzəyən 4,3 düymlük E-Ink displeyidir. Bu ekran gözləri demək olar ki, yormur, parlaq günəş işığında yaxşı görünür və mavi işıq yaymır.
Smartfon müasir cihazlarda tələb olunan əsas funksiyaları da təqdim edir: barmaq izi sensoru, "Android Auto", NFC, "Bluetooth" və simsiz şarj dəstəyi.
Daxilində 3000 mAh batareya quraşdırılıb və bu, üç günə qədər müstəqil işləməyə imkan verir.
Ikko MindOne Pro
Bu qeyri-adi Android smartfonu ehtiyac olduqda fiziki klaviaturalı modelə çevrilə bilir.
Cihazın özü 90 Hz yenilənmə tezliyinə malik 4,02 düymlük sensor ekranla təchiz olunub. Lakin kvadrat formasına görə ekrandakı klaviaturadan istifadə etmək həmişə rahat deyil.
İstehsalçı əlavə olaraq xüsusi klaviaturalı örtük təklif edir. Bu örtük tam ölçülü QWERTY klaviaturası əlavə etməklə yanaşı, batareyanın tutumunu 500 mAh artırır və 3,5 mm qulaqlıq girişinə malikdir.
"Ikko MindOne Pro" modelinin qeyri-adi xüsusiyyətlərindən biri həm arxa, həm də ön kamera kimi işləyən fırlanan kameradır.
Ekspertlərin fikrincə, müasir fiziki klaviaturalı smartfonları artıq yalnız nostalji cihazlar hesab etmək olmaz.
Bu modellər aktual Android versiyaları, uzunmüddətli proqram dəstəyi, keyfiyyətli ekranlar və süni intellekt funksiyaları təqdim edir. Eyni zamanda sənədlərlə və mesajlaşma tətbiqləri ilə tez-tez işləyən istifadəçilər üçün yaxşı seçim olaraq qalır.
Samir
