Çin ölkəni demək olar ki, tam şəkildə əhatə edəcək nəhəng avtomobil yolu marşrutu yaradır. Təxminən 27 min kilometr uzunluğunda olacaq layihənin dəyərinin 47 milyard avro təşkil edəcəyi bildirilir.

HİT.az xəbər verir ki, bu barədə "Global Times" yazıb.

Çin Nəqliyyat Nazirliyinin açıqlamasına görə, layihə 2026–2030-cu illəri əhatə edən 15-ci beşillik plan çərçivəsində G219, G331 və G228 magistrallarının birləşdirilməsi ilə həyata keçiriləcək. Nəticədə “Qızıl xarici halqa” adlandırılan nəhəng quru marşrutu yaranacaq.

Marşrut dağlardan və səhralardan keçəcək

Layihənin əsas hissələrindən biri olan G331 magistralı Çinin şimalında yerləşir və təxminən 9 200 kilometr uzunluğundadır. Yol ölkənin şimal-şərqindəki Lyaonin əyalətinin Dandun şəhərindən başlayaraq şimal-qərbdəki Sincan-Uyğur Muxtar Rayonunun Altay bölgəsinə qədər uzanır. Marşrut düzənliklər, meşələr, çöllər və dağlıq ərazilərdən keçir.

G219 isə daha mürəkkəb relyefi ilə seçilir. Magistral Çinin ən böyük səhrası olan Təklə-Məkan, Çinin Tibet yaylası, Himalay dağları və dərin dərələrdən keçir.

Halqanın sahil hissəsini təşkil edən G228 magistralı isə ölkənin əsas limanlarını birləşdirir. Yol Yalu, Lyaohe, Hayhe, Sarı çay, Xuayhe, Yantszı və Çjutszyan kimi böyük çayları keçir.

Beləliklə, marşrut buzlaqlardan, dağlardan, səhralardan, meşələrdən, dərələrdən və okean sahillərindən keçən nəhəng səyahət xəttinə çevriləcək.

Turistlərin də marağı artır

Layihə artıq səyahət həvəskarlarının diqqətini cəlb edib. Məlumata görə, 2026-cı ilin ilk yarısında yalnız G331 magistralı boyunca yerləşən ərazilərə 2 milyondan çox turist səfər edib.

Sərhəd bölgələrindəki yaşayış məntəqələri də artan turist axınından faydalanmağa çalışır. Burada yerli sakinlər qonaq evləri, iaşə xidmətləri və kənd təsərrüfatı məhsullarının satışı ilə əlavə gəlir əldə edirlər.

Layihənin iqtisadi əhəmiyyəti

27 min kilometrlik yol yalnız turizm üçün nəzərdə tutulmayıb. Layihənin əsas məqsədlərindən biri Çinin daxili ticarət və logistika şəbəkəsini beynəlxalq bazarlarla daha sıx əlaqələndirməkdir.

Qərbdə marşrutun “Quru-dəniz” beynəlxalq ticarət dəhlizi və Çin-Avropa dəmir yolu ekspressi ilə, şərqdə isə dəniz ticarət marşrutları ilə əlaqələndirilməsi planlaşdırılır.

Yeni sistem Çin ərazisindəki böyük limanları sərhəd keçid məntəqələri və daxili logistika mərkəzləri ilə birləşdirəcək. Bunun daşımaların xərclərini azaltması, nəqliyyatın səmərəliliyini artırması və alternativ marşrutların sayını çoxaltması gözlənilir.

Beləliklə, 27 min kilometrlik “Qızıl xarici halqa” Çinin həm ən möhtəşəm turizm marşrutlarından birinə, həm də ölkənin logistika və ticarət sisteminin mühüm hissəsinə çevrilə bilər.

Samir