Ölkə bazarlarında gündəlik tələbat malları arasında xüsusi yeri olan kartofun qiymətində sabitlik müşahidə edilməkdədir. 

Hit.az-ın əməkdaşı bu barədə bazar və marketlərdə müşahidələr aparıb.

Hazırda satış məntəqələrində kartofun bir kiloqramı 80 qəpik ilə 1 manat arasında dəyişən qiymətlərlə alıcılara təqdim olunur. Satıcılar bildirirlər ki, qiymətlərin bu aralıqda olması məhsulun çeşidindən və mənşəyindən birbaşa asılıdır. Yerli fermerlər tərəfindən yetişdirilən keyfiyyətli kartoflar alıcılar tərəfindən daha böyük maraqla qarşılanır. Məhsulun iriliyi, xarici görünüşü və saxlanma müddəti də satış qiymətinə təsir edən əsas amillərdəndir. 

Bəzi bazarlarda daha kiçik ölçülü kartofları 80 qəpiyə tapmaq mümkün olduğu halda, seçilmiş iri məhsullar 1 manata satılır. Kartofu 2-3 kiloqram alanlarla yanaşı, 10 kiloqramlıq paketlərdə alanlar da az deyil. Həmin paketlər də 8, 9 və 10 manata təklif olunur.

Alıcılar mövcud qiymətlərin ümumilikdə büdcələrinə uyğun olduğunu və kəskin bahalaşmanın hiss edilmədiyini vurğulayırlar. Satıcıların fikrincə, bazarda təklif olunan məhsulun həcmi tələbatı tam şəkildə ödəməyə imkan verir. Əhalinin kütləvi şəkildə alış-veriş etdiyi həftəsonu günlərində kartof stendlərində daha böyük canlanma yaşanır. Yaxın dövrdə kartof qiymətlərində kəskin bir artımın gözlənilmədiyi və sabitliyin davam edəcəyi proqnozlaşdırılır.

Pərviz