Nəsillər arasındakı fərqlər hər zaman müzakirə mövzusu olub və bu gün də aktuallığını qoruyur. Mütəxəssislərin fikrincə, müəyyən nəsillərlə bağlı stereotiplər bəzən həddindən artıq ümumiləşdirilmiş olsa da, eyni sosial-iqtisadi və mədəni mühitdə böyüyən insanların oxşar davranış modelləri nümayiş etdirməsi təəccüblü deyil.

HİT.az xəbər verir ki, “YourTango” nəşrində dərc olunan məqaləsində sosial münasibətlər üzrə mütəxəssis Zayda Slabbekoornun sözlərinə görə, Z nəslinin (zumerlər) nümayəndələrinin Y nəslinə qarşı bir sıra iradları var.

Zumerləri qıcıqlandıran beş əsas xüsusiyyət

Gənclərə yuxarıdan aşağı baxmaq

Məqalədə qeyd olunur ki, bir çox zumer Y nəslinin özlərini gənc nəsildən fərqli göstərməyə çalışmasını və bu fərqi xüsusi vurğulamasını xoş qarşılamır. Onların fikrincə, bəzi hallarda Y nəsli bunu üstünlük nümayiş etdirmək vasitəsinə çevirirlər.

Ənənəvi ailə dəyərlərinə bağlılıq

Y nəsli ailə və münasibətlər məsələsində ilk həqiqətən mütərəqqi nəsillərdən biri hesab olunsa da, onlar eyni zamanda ənənəvi ailə modelinə böyük önəm verən son nəsillərdən biri kimi qiymətləndirilirlər. Bu yanaşma isə bəzi zumerlər tərəfindən köhnəlmiş baxış kimi qəbul edilir.

“Böyük bacı və ya böyük qardaş” davranışı

Gənclər Y nəsli nümayəndələri tez-tez məsləhət verməsindən, həyat təcrübəsini ön plana çıxarmasından və özlərini müəllim rolunda təqdim etməsindən narazıdırlar. Xüsusilə iş mühitində və gündəlik ünsiyyətdə yaş fərqinin tənqid üçün arqument kimi istifadə edilməsi mənfi qarşılanır.

1990-cı illərin mədəniyyətinə sahib çıxmaq

Müəllif qeyd edir ki, Z nəslinin nümayəndələri Y nəslinin 1990-cı illərin mədəni irsinə həddindən artıq sahib çıxmağa çalışdığını düşünürlər. Gənclər hesab edir ki, həmin dövrün musiqisi, filmləri və ümumi mədəniyyəti yalnız bir nəslə aid deyil və hamı tərəfindən paylaşılmalıdır.

İşə həddindən artıq ciddi yanaşmaq

Bir çox Y nəsli nümayəndəsi valideynlərindən miras qalmış iş mədəniyyətini qoruyub saxlayır və işə maksimum sədaqət göstərməyin vacibliyinə inanır. Zumerlər isə işə daha praqmatik yanaşır, onu həyatın mərkəzi deyil, zəruri bir fəaliyyət kimi görürlər. Onlar hesab edirlər ki, işə minimum tələb olunan vaxt və enerji sərf etmək kifayətdir.

Psixologiya ilə bağlı digər araşdırmalar

Mütəxəssislər bildirirlər ki, fərqli yuxu rejimlərinə malik olmaq bir çox cütlük üçün problem yaratmır, əksinə münasibətləri daha da möhkəmləndirə bilər. Ayrı yatmaq məhsuldarlığı və yaradıcılığı artırmaqla yanaşı, şəxsi məkanın qorunmasına da kömək edir.

Bundan başqa, psixoloqlar uşaqların tərbiyəsində məktəb qiymətlərindən və təbii istedadlardan daha vacib olan bir bacarığın mövcudluğunu vurğulayırlar. Onların fikrincə, özünənəzarət uşaqlara emosiyalarını, davranışlarını və gündəlik vərdişlərini idarə etməyi öyrədir, bu isə məsuliyyətli və xarakterli şəxsiyyət formalaşdırır.

Samir