Soyuducu seçərkən onun tutumu ilə ölçüləri arasında düzgün balans tapmaq vacibdir. Buna görə istehsalçılar həm standart dərinlikli, həm də daha nazik korpuslu modellər təklif edirlər. Daha az dərinliyə malik modelləri mətbəx mebelləri ilə eyni səviyyədə yerləşdirmək daha asandır. Hər iki halda əsas şərtlərdən biri cihazın ətrafında kifayət qədər boş sahənin olmasıdır.
HİT.az xəbər verir ki, bu barədə "SlashGear" yazır.
Materialda qeyd olunur ki, istehsalçıların tövsiyələri fərqli olsa da, onların hamısı soyuducu ilə divar arasında müəyyən məsafə saxlanılmasının vacibliyini vurğulayır.
Məsələn, "LG" soyuducunun arxa və yan hissələri ilə divar arasında ən azı 10 santimetr, yuxarı hissəsi ilə tavan arasında isə 30 santimetr boşluq saxlanılmasını tövsiyə edir.
"KitchenAid" isə aşağıdakı tövsiyələri verir:
* Yan və yuxarı hissələrdə ən azı 6,35 millimetr boşluq saxlayın.
* Soyuducu sabit divarın yanında quraşdırılırsa, qapının tam açılması üçün divar tərəfdə ən azı 6,35 santimetr məsafə qoyun.
"Samsung" isə ideal halda cihazın hər iki tərəfində 5–7 santimetr boşluq saxlanılmasını tövsiyə edir. Bu mümkün olmadıqda, ən azı 2–3 santimetr məsafə kifayət hesab olunur.
Soyuducuya niyə boş sahə lazımdır?
Soyuducu işləyərkən daxildə yaranan istiliyi xarici mühitə ötürür. Bu proses kompressor, kondensator və buxarlandırıcı kimi əsas hissələrin fəaliyyəti sayəsində baş verir.
Məqalədə qeyd olunur ki, soyutma prosesi buxarlanma prinsipi əsasında işləyir və yaranan istilik mətbəxin havasına ötürülür. Buna görə də qızmış havanın sərbəst dövr etməsi üçün cihazın ətrafında kifayət qədər boşluq olmalıdır.
Əgər soyuducunun ətrafında hava dövranı zəif olarsa, cihaz daxildə tələb olunan temperaturu saxlamaq üçün daha intensiv işləməli olacaq. Bu isə həm elektrik enerjisi sərfiyyatını artırır, həm də soyuducunun istismar müddətini qısalda bilər. Bundan əlavə, temperatur dəyişikliyinə həssas qidaların keyfiyyəti də mənfi təsir görə bilər.
Samir
