Uşaqlıqda valideynlərinin emosional laqeydliyi, həddindən artıq nəzarəti və ya alçaldıcı davranışı ilə üzləşən insanlar yetkin yaşlarında da oxşar münasibət modellərini təkrarlaya bilərlər. Psixoloqların müşahidələrinə görə, belə şəxslər bəzən özlərinə zərər verən davranışları normal qəbul edir və fərqinə varmadan toksik partnyorlar seçirlər.

HİT.az xəbər verir ki, bu barədə “Your Tango” nəşrində dərc olunan məqalədə qeyd olunub.

Məqalədə emosional cəhətdən yetkin olmayan valideynlərin övladlarının münasibət qurarkən daha çox meyil göstərə biləcəyi beş partnyor tipi sadalanıb.

1. Həddindən artıq nəzarət edən partnyor

Uşaqlıqda valideyn qayğısından və diqqətindən məhrum olan insanlar bəzən nəzarəti sevgi və qayğı əlaməti kimi qəbul edirlər. Partnyorun onların qərarlarına müdaxilə etməsi, davranışlarını məhdudlaşdırması ilk baxışda maraq və diqqət təsiri bağışlaya bilər. Halbuki bu, qarşı tərəfi idarə etmək cəhdi və şəxsi azadlığın məhdudlaşdırılması ola bilər.

2. Emosional baxımdan uzaq və laqeyd insan

Uşaqlıqda hissləri və ehtiyacları nəzərə alınmayan şəxslər böyüdükdə də emosional yaxınlıq qurmaqda çətinlik çəkə bilərlər. Onlar partnyorun soyuq münasibətinə alışır, dəstək və diqqət görməsələr belə, bu münasibəti davam etdirirlər. Bəzən kömək istəməkdə və öz emosional ehtiyaclarını ifadə etməkdə də çətinlik yaşayırlar.

3. Daim tənqid edən və alçaldan partnyor

Valideynləri tərəfindən tez-tez danlanan, utandırılan və seçimlərinə görə qınanan insanlar yetkin yaşlarında da təhqir və alçaldıcı münasibəti adi hal kimi qəbul edə bilərlər. Belə partnyorlar qarşı tərəfin özünəinamını sarsıdır, onu davamlı tənqid edir və dəyərsiz hiss etdirirlər. Nəticədə insan öz sərhədlərini qorumaqda çətinlik çəkə bilər.

4. Daim günahı qarşı tərəfin üzərinə atan insan

Bu tip partnyorlar öz səhvlərini qəbul etməkdən yayınır, baş verənlərə görə qarşı tərəfi günahlandırır və bəzən susmaqla onu cəzalandırmağa çalışırlar. Uşaqlıqda hissləri kiçildilən və tez-tez günahlandırılan insanlar belə davranışlarla qarşılaşanda problemin fərqinə dərhal varmaya bilərlər. Çünki bu münasibət forması onlara tanış gəlir.

5. Davranışları ilə daim gərginlik yaradan partnyor

Belə münasibətlərdə insan qarşı tərəfin reaksiyasını əvvəlcədən təxmin edə bilmir. Mübahisə və ya qəzəb doğurmamaq üçün hər sözünü ölçüb-biçməli, partnyorunun əhvalına uyğun davranmağa çalışmalıdır. Uşaqlıqda emosional baxımdan qeyri-sabit ailə mühitində böyüyən şəxslər üçün bu vəziyyət tanış ola bilər.

Məqalədə vurğulanır ki, uşaqlıq təcrübəsi insanın gələcək münasibətlərinə təsir göstərə bilər. Lakin tanış gələn davranış modeli mütləq sağlam münasibət demək deyil. Nəzarət, laqeydlik, təhqir və manipulyasiya sevgi və qayğı kimi qəbul edilməməli, münasibətlərdə qarşılıqlı hörmət və şəxsi sərhədlər qorunmalıdır.

Samir