Astrologiya və numerologiyaya görə, yanvar, mart, avqust və noyabr aylarında doğulan insanlar müstəqillikləri və şəxsi məkanlarına verdikləri önəmlə seçilirlər. Onlar dostlarına və ailələrinə bağlı olsalar da, xoşbəxt olmaq üçün daim başqalarının əhatəsində olmağa ehtiyac duymurlar.

HİT.az xəbər verir ki, bu barədə “Parade” jurnalı bu xüsusiyyətlərlə əlaqələndirilən dörd doğum ayı barədə yazıb.

Yanvar

Yanvarda doğulanlar öz qərarlarını verməyə və həyat yollarını müstəqil müəyyənləşdirməyə üstünlük verirlər. Oğlaqlar praktik yanaşmaları, Dolçalar isə öz qaydaları ilə hərəkət etməyə meyilli olmaları ilə fərqləndirilir. Onlar hər kəslə dərhal yaxınlaşmır, ətraflarına buraxdıqları insanları diqqətlə seçirlər. Bu, yaxınlarına qarşı soyuq olduqları anlamına gəlmir — sadəcə, şəxsi sərhədlərini qorumağa çalışırlar.

Mart

Mart ayında doğulanların zəngin daxili aləmə sahib olduqları və düşüncələrinə dalmağı sevdikləri bildirilir. Balıqlar xəyallara qapılmağa, Qoçlar isə təkbaşına yeni macəralara atılmağa meyilli hesab olunur. Çətinliklərlə üzləşdikdə hisslərini başqaları ilə bölüşməzdən əvvəl vəziyyəti özləri təhlil etməyə çalışırlar. Onlar üçün tək səyahət etmək, şəxsi layihələrlə məşğul olmaq və sakitlikdə dincəlmək enerji toplamağın yollarından biridir.

Avqust

Avqustda doğulanlar həyatlarını öz istəklərinə uyğun qurmağa çalışır və başqalarının fikirlərinin onlara diktə edilməsini sevmirlər. Şirlər özünəinamı və qətiyyətləri, Qızlar isə düşünülmüş qərarları ilə xarakterizə olunur. Hər iki bürcün nümayəndələri müstəqilliyə önəm verir. Onlar insanlarla vaxt keçirməyi sevsələr də, problemlərini ilk növbədə özləri həll etməyə çalışırlar.

Noyabr

Noyabrda doğulanlar şəxsi həyatlarını və düşüncələrini hər kəslə bölüşməyə tələsməyən insanlar kimi təsvir olunur. Əqrəblər özəl həyatlarını qorumağa, Oxatanlar isə yeni təcrübələr qazanmaq üçün tək səyahətlərə çıxmağa meyilli hesab edilirlər. Onların çoxlu dostu ola bilər, lakin uzun ünsiyyətdən sonra sakitliyə ehtiyac duyurlar. Tək qalmaq onlar üçün problem deyil, əksinə, dincəlmək və güclərini bərpa etmək imkanıdır.

Qeyd: Bu xüsusiyyətlər astrologiya və numerologiyaya əsaslanan şərhlərdir. Doğum ayının insanın xarakterini və tək qalmağa münasibətini müəyyən etdiyini təsdiqləyən elmi sübut yoxdur.

Samir