Kiçik otaqlarda hər kvadratmetrin düzgün istifadə olunması böyük əhəmiyyət daşıyır. Dizaynerlər bildirirlər ki, interyerdə tətbiq edilən bir sıra sadə üsullar məkanı vizual olaraq daha geniş və işıqlı göstərə bilər.

HİT.az xəbər verir ki, "The Spruce" nəşrinin topladığı dizayn tövsiyələrinə əsasən, bu üsullar qonaq otağı, yataq otağı, mətbəx və yemək otağı da daxil olmaqla istənilən kiçik məkan üçün uyğundur.

Təbii işıqdan maksimum istifadə edin

İnteryer dizayneri Keti Kuo qeyd edir ki, otağa daxil olan təbii gün işığı məkanı daha geniş göstərən əsas amillərdən biridir.

Onun sözlərinə görə, divar güzgüləri işığın əks olunmasını artıraraq həm dərinlik hissi yaradır, həm də dekorativ element kimi istifadə oluna bilər.

"Məkanın işıqlandırılması ilə düzgün işləmək kiçik otağı daha geniş və rahat göstərir", – deyə o bildirib.

Açıq rənglərə üstünlük verin

Dizaynerlər divarların ağ, bej və ya açıq mavi, çəhrayı, yaşıl kimi pastel tonlarda rənglənməsini tövsiyə edirlər. Bu rənglər təbii işığı daha yaxşı əks etdirərək otağın daha işıqlı görünməsinə kömək edir.

Tavanın da divarlarla uyğun açıq çalarda rənglənməsi işığın yayılmasını artırır və məkanı vizual olaraq böyüdür.

Mebelləri düzgün seçin

Dizayn və tikinti üzrə mütəxəssis Elizabet Verqara bildirir ki, mebellərin ölçüsü otağın sahəsinə uyğun olmalıdır.

Onun sözlərinə görə, iri mebellər kiçik otaqlarda məkanı daraldır. Mebellərin elə yerləşdirilməsi vacibdir ki, sərbəst hərəkət üçün kifayət qədər boş sahə qalsın.

Hündür ayaqlı divan və kreslolar döşəmənin daha çox görünməsini təmin etdiyindən otaq daha açıq və səliqəli təsir bağışlayır.

Çoxfunksiyalı mebellərdən istifadə edin

Dizaynerlər gizli saxlama bölmələri olan, həm oturacaq, həm də yataq kimi istifadə edilə bilən mebellərin seçilməsini məsləhət görürlər.

Belə mebellər həm yerə qənaət edir, həm də otağın daha səliqəli görünməsinə kömək edir.

Şaquli sahədən yararlanın

Kiçik mənzillərdə divar hündürlüyündən maksimum istifadə etmək tövsiyə olunur.

İnteryer dizayneri Arin Aqase bildirir ki, dar və hündür nişlər kitab rəfləri və ya saxlama sahələri üçün ideal seçimdir.

Onun sözlərinə görə, döşəmədən tavana qədər uzanan dekor elementləri də otağı vizual olaraq daha hündür göstərir.

Pərdələri tavana yaxın asın

Mütəxəssislər pərdə karnizinin mümkün qədər tavana yaxın quraşdırılmasını tövsiyə edirlər. Bu üsul tavanı daha hündür göstərərək otaqda genişlik hissini artırır.

Eyni zamanda, yarımşəffaf və yüngül pərdələr təbii işığın otağa maneəsiz daxil olmasına şərait yaradır və məkanı daha işıqlı göstərir.

Dizaynerlər hesab edirlər ki, bu sadə üsullar bahalı təmirə ehtiyac olmadan kiçik otaqları daha rahat, işıqlı və geniş göstərməyə imkan verir.

Samir