Paltaryuyan maşın istifadəçilərinin əksəriyyəti yuyucu vasitələr üçün nəzərdə tutulmuş çekməcədəki üç bölmənin hansı məqsədə xidmət etdiyini düşünmür. Halbuki bu bölmələrdən düzgün istifadə edilməməsi paltarların keyfiyyətli yuyulmamasına, həmçinin maşının daxilində çöküntü və kirin toplanmasına səbəb ola bilər.

HİT.az xəbər verir ki, "Android" nəşrinin yazdığına görə, müasir paltaryuyan maşınların əksəriyyətində çekməcə üç hissəyə bölünür:

* I – ön yuma üçün;
* II – əsas yuma üçün;
* Gül və ya ulduz işarəsi – yumşaldıcı (kondisioner) üçün.

"I" işarəli bölmə yalnız ön yuma proqramı seçildikdə istifadə olunur. Bu rejim əsasən çox çirkli geyimlər, məsələn, iş paltarları və ya idman geyimləri üçün nəzərdə tutulub.

"II" işarəli bölməyə isə yuyucu toz və ya maye yuyucu vasitə tökülməlidir. Maşın əsas yuma mərhələsində məhz bu bölmədən yuyucu vasitəni götürür. Vasitə başqa bölməyə töküldükdə yumanın keyfiyyəti nəzərəçarpacaq dərəcədə aşağı düşə bilər.

Gül işarəsi olan bölmə yalnız yumşaldıcı üçündür. Maşın bu vasitədən yalnız son yaxalama mərhələsində istifadə edir. Nəticədə paltarlar daha yumşaq olur və xoş ətir qazanır.

Bölmələrin yerləşməsi paltaryuyan maşının modelindən asılı olaraq dəyişə bilər. Bəzi modellərdə ön yuma rejimi olmur, ABŞ bazarı üçün istehsal edilən bəzi cihazlarda isə ağardıcı vasitə üçün ayrıca bölmə nəzərdə tutulur.

Ən geniş yayılmış səhvlərdən biri yuyucu vasitəni yumşaldıcı üçün nəzərdə tutulmuş bölməyə tökməkdir. Bu halda vasitə yalnız yaxalama mərhələsində tambura daxil olur və ləkələri təmizləyə bilmir.

Eyni dərəcədə yanlış addım yumşaldıcını əsas yuma bölməsinə tökməkdir. Bu zaman o, proqramın əvvəlində yuyulub gedir və funksiyasını yerinə yetirmir.

Bundan başqa, yumşaldıcını "MAX" işarəsindən artıq doldurmaq məsləhət görülmür. Artıq miqdar tambura vaxtından əvvəl daxil ola, parçada izlər və yağlı ləkələr yarada bilər.

İstehsalçılar ön yuma rejimindən yalnız həqiqətən çox çirkli paltarlar üçün istifadə etməyi tövsiyə edirlər. Digər hallarda birinci bölməni boş saxlamaq daha məqsədəuyğundur.

Yuyucu toz və ya maye vasitə istehsalçının təlimatına uyğun dozada istifadə edilməli və yalnız "II" işarəli bölməyə tökülməlidir. Yuyucu vasitənin normadan artıq istifadəsi nəticəni yaxşılaşdırmır, əksinə, maşının daxilində çöküntünün yaranmasını sürətləndirir.

Mütəxəssislər həmçinin çekməcəni mütəmadi olaraq çıxarıb axar su altında yumağı, yuyucu vasitə qalıqlarını və kif izlərini təmizləməyi tövsiyə edirlər. Bu sadə qulluq paltaryuyan maşının xidmət müddətini uzatmağa və yumanın keyfiyyətini qorumağa kömək edir.

Samir