Professor Qulu Məhərrəmli sosial media hesabında atəşkəs razılaşması ilə bağlı öz fikirlərini bölüşüb.

HİT.Az həmin fikirləri təqdim edir:

"Atəşkəs Azərbaycan xalqının iradəsinə və mövcud reallığına tam ziddir. Amma görünür ki, münaqişəni bizə sırımış riyakar Moskvanın da bu məsələdə öz planları var!

Bununla yanaşı deyim ki, biz məyus olmamalı və ruhdan düşməməliyik... çünki “Kreml bəyanatı” ciddi hüquqi sənəd deyildir, yalnız niyyətlərin ifadəsidir və tərəflərin üzərinə heç bir öhdəlik qoymur. O səbəbdən də bu əldəqayırma atəşkəsin ən yaxın günlərdə Ermənistanın günahı ucbatından pozulacağına əminəm...

Digər tərəfdən, biz artıq bölgədə geopolitikanın, hərbi-siyasi şəraitin və status-kvonun dəyişdiyini də görməliyik.

Bu dəyişiklik imkan verir ki:

1) Danışıq şərtlərini Azərbaycan diqtə etsin;

2) Bakı beynəlxalq hüququn verdiyi üstünlüyü real (əməli) üstünlüyə çevirsin;

3) BMT-nin 4 qətnaməsi reallaşdırılsın;

4) separatçı rejimin fəaliyyəti, xüsusən hərbi davranışları nəzarətdə saxlanılsın;

5) Ermənistanın və başqa kənar qüvvələrin Qarabağla hərbi əlaqələri məhdudlaşsın;

6) Azərbaycan Ordusu istədiyi vaxt əks-hücum əməliyyatlarını bərpa etsin.

Əlbəttə, indi əsas məsələ budur ki, ordunun əli tətikdə olsun, şəhidlərimizin qanı batmasın və ən əsası, Ali Baş komandan ölkəmizə soxulmuş təcavüzkarları “İti qovan kimi qovmaq” fikrini dəyişməsin!!!"