Belçikanın Nyuport şəhərində yeni inzibati binanın tikintisi gözlənilməz nəticə verib. Arxeoloqlar təxminən 500 orta əsr top gülləsindən ibarət “xəzinə” tapdıqlarını bildiriblər. 

HİT.az xəbər verir ki, bu barədə "Interesting Engineering" yazır.

Yeni hökumət binasının tikintisinə hazırlıq çərçivəsində ərazidə arxeoloji qazıntılar aparılıb. Qazıntılara Van Voren komandası rəhbərlik edib. Tikinti sahəsi orta əsr bələdiyyə binası və şəhər istehkamları arasında yerləşdiyi üçün burada tarixi tapıntıların olacağı əvvəlcədən gözlənilirdi.

Şəhər meri Nyuportun “tarixin sözün əsl mənasında hər yerdə olduğu bir şəhər” olduğunu bildirib.

Qazıntılar zamanı köhnə divar və döşəmə qalıqları aşkar edilib, lakin onların funksiyası hələ də dəqiq bilinmir. Arxeoloqlar ehtimal edirlər ki, bu tikililər şəhərin mərkəzi mövqeyinə görə inzibati məqsədlər üçün istifadə olunub.

Lakin ən çox diqqət çəkən tapıntı məhz 500-ə yaxın orta əsr top gülləsi olub. Onların yüksək keyfiyyətdə işlənməsi bu daşların odlu silahlar üçün nəzərdə tutulduğunu göstərir. Güllələrin ölçülərinin fərqli olması Nyuportda müxtəlif növ silah sistemlərinin mövcudluğuna işarə edir. 1641-ci ildə Antonius Sanderus tərəfindən çəkilmiş xəritədə də bu ərazidə top mövqeləri göstərilib.

Alimlərin sözlərinə görə: “Ən çox müzakirə olunan tapıntı, şübhəsiz ki, onlarla təbii daş top gülləsindən ibarət xəzinədir. Bu cür güllələr təxminən 1350–1600-cü illərdə istifadə olunub və həm toplardan, həm də katapult və trebuşelərdən atıla bilirdi".

Tapıntıların yerləşməsi onların döyüşdə istifadə olunmadığını, ehtimal ki, ehtiyat və ya müdafiə məqsədilə saxlanıldığını göstərir.

Bundan əlavə, Birinci Dünya müharibəsi dövrünə aid partlamamış mərmi də aşkar edilib. DOVO minatəmizləmə xidməti dərhal əraziyə cəlb olunaraq mərmini zərərsizləşdirib.

Bu tapıntı Nyuportun 1914–1918-ci illərdə ciddi dağıntılara məruz qaldığını xatırladır.

Ümumilikdə qazıntılar bölgənin hərbi tarixini ön plana çıxarıb.

Alimlər qeyd edirlər ki, bu tapıntılar gözləntiləri aşaraq şəhərin minillik tarixinin yeni qatlarını üzə çıxarıb.

Şəhər meri Kris Vande Kastel bildirib ki, Nyuportda hər tikinti prosesi eyni zamanda tarixə səyahətdir və bu keçmiş hələ tam açılmayıb.

Onun sözlərinə görə, yeni inzibati mərkəzin məhz bu tarixi ərazidə inşa olunması keçmişlə gələcəyi birləşdirən simvolik addımdır.

Samir