Ukrayna Prezident Ofisinin rəhbəri Kirilo Budanov Prezident Volodimir Zelenskiyə müharibənin dayandırılması naminə Donbasın Rusiyaya verilməsinə razı olmamağı tövsiyə edib. 

HİT.az xəbər verir ki, bu barədə "The New York Times" Budanovla Kiyevdə keçirdiyi müsahibənin nəticələrinə əsasən yazıb.

Budanov ötən qış Rusiya və ABŞ-la danışıqlarda Ukrayna nümayəndə heyətinə rəhbərlik edib. Həmin dövrdə danışıqlar prosesi intensiv şəkildə davam etsə də, sonradan dalana dirənib.

"NYT" yazır ki, hazırda Rusiya və Ukrayna müharibənin eskalasiyası mərhələsindədir. Tərəflər qismən yekun sülh danışıqlarında üstünlük əldə etmək məqsədilə hərbi əməliyyatları gücləndirirlər.

Budanovun fikrincə, ABŞ Prezidenti Donald Trampın administrasiyasının iştirakı ilə danışıqlar sentyabrın sonunda, Rusiyada parlament seçkilərindən sonra və ABŞ-da keçiriləcək aralıq seçkilərinə bir neçə həftə qalmış yenidən başlaya bilər.

Bununla belə, "NYT"nin yazdığına görə, Kiyevdə Rusiya ilə mümkün razılaşmalar məsələsində tam birlik yoxdur. Nəşr "Carnegie Russia Eurasia Center"in materialına istinad edərək Budanovu yeni böyük itkilərin qarşısını almaq üçün nizamlanmanı dəstəkləyən düşərgənin nümayəndəsi kimi xarakterizə edir.

Ukrayna rəhbərliyinin digər hissəsi isə ciddi ərazi güzəştlərinə qarşı çıxır. Onlar belə addımın hərbçilərin və cəmiyyətin ruhdan düşməsinə səbəb ola biləcəyindən ehtiyat edirlər.

Bununla yanaşı, Budanov özü "NYT"yə müsahibəsində məhz onun Zelenskiyə Donbasdan geri çəkilməyə razı olmamağı tövsiyə etdiyini bildirib.

"Ərazidən imtina etmək Moskvanı onun ordusunun ələ keçirə bilmədiyi bir mükafatla təmin edərdi", – nəşr Budanovun mövqeyini izah edərək yazıb.

Danışıqların artıq bu ay bərpa ediləcəyi gözlənsə də, Budanov yaxın zamanda atəşkəs əldə olunacağını proqnozlaşdırmır. Onun qiymətləndirməsinə görə, hərbi əməliyyatların dayandırılması üçün şərait ən tez yaz aylarında yarana bilər.

Ukraynalı rəsmi hesab edir ki, Rusiya böyük ehtimalla qarşıdan gələn qışda Ukraynaya raket və pilotsuz uçuş aparatları ilə daha bir genişmiqyaslı hücum kampaniyası həyata keçirməyə çalışacaq.

Bununla belə, Budanov danışıqlar prosesinin gec-tez nəticə verəcəyinə əmindir.

"Danışıqlar gec-tez hansısa nəticəyə gətirib çıxaracaq. Siz bütün ömrünüz boyu müharibə apara bilməzsiniz", – Budanov bildirib.

Samir